USD
ГУЙЯН. 21 маусым. Қытайдың Гуйян қаласында өтіп жатқан бокстан Әлем кубогы екінші кезеңінде 50 келіге дейінгі салмақта Санжар Тәшкенбай алтын медаль жеңіп алды. Бұл туралы Olimpik.kz ақпарына сүйенген rast.kz хабарлайды.
Қазақстан құрамасының мүшесі Санжар Тәшкенбай Қытайдың Гуйян қаласында өтіп жатқан Әлем кубогының екінші кезеңінде жеңіс тұғырының ең биік сатысына көтерілді.
Финалда біздің жігіт өзбекстандық Асилбек Жалиловты тізе бүктірді. Ол төрешілер пікірлерінің екіге жарылуымен, 3:2 деген есеппен ұтты.
Айта кетейік, бұл Қазақстан құрамасының қоржынына түскен төртінші алтын медаль болды. Бұған дейін Назым Қызайбай (54 келіге дейін), Виктория Графеева (60 келіге дейін) және Абылайхан Жүсіпов (70 келіге дейін) жеңімпаз атанған еді.
