USD
НАГОЯ. 2 қазан. Қазақстандық боксшы Айбек Оралбай Жапонияда өтіп жатқан 2026 жылғы жазғы Азия ойындарында алтын медаль жеңіп алды. Бұл туралы Vesti.kz ақпарына сілтеме жасаған rast.kz хабарлайды.
Команда капитаны 90 келіден ауыр салмақ дәрежесінің финалында өзбек Жахонгир Зокировпен шайқасты. Оның қарсыласы Ливерпульдегі 2025 жылғы әлем чемпионатының күміс жүлдегер атанған болатын.
Бірінші раунд Оралбайдың пайдасына шешілді, есеп – 3:2. Айбек екінші раундта қарқынды үдетіп, 5:0 есебімен басым түсті. Үшінші раундта да біздің бағлан басымдық танытты – 4:1!
Қазақстандық боксшылар соңғы рет 2014 жылы Кореяның Инчхон қаласында өткен Азиядада тұғырдың ең биік сатысынан көрініп еді. Ол жолы олар 6 алтын медальді қанжығаға салған. Турнирде Ілияс Сүлейменов (52 келі), Данияр Елеусінов (69 келі), Жәнібек Әлімханұлы (75 келі), Әділбек Ниязымбетов (81 келі), Антон Пинчук (91 келі) және Иван Дычко (91 келіден жоғары) чемпион атанды.
Ал 2018 жылы Джакартада, 2022 жылы Ханчжоуда өткен Ойындарда Қазақстан құрамасы бокстан алтын медаль ала алмады.
Еске сала кетейік, бұған дейін Төрехан Сабырхан Азиаданың алтын медалін жеңіп алған болатын. Бұл – Азия ойындарында 12 жылдан кейін Қазақстан боксы қол жеткізген жоғары жүлде.
