USD
ҚАРАҒАНДЫ. 21 шілде. Қарағандылық модель Алика Мухамадиева Threads-тегі қазақтарды қорлауға арналған жазбасы үшін қамауға алынды. Бұл туралы Orda.kz ақпарына сүйенген rast.kz хабарлайды.
Енді ұлтаралық наразылықты қоздырған бойжеткен 2 жылдан 7 жылға дейінгі мерзімге сотталуы мүмкін.
Қазақстанда әлеуметтік желілерде, әсіресе, Threads-те қазақша сөйлеуді талап ететін азаматтарға қатысты «казахшасөйлешник» деп айдар тағып, түрлі теріс пікір жазатындар көбейді. Осы тақырыпта қоғам арасында дау туып, тілге, ұлтқа қатысты тіл тигізген желі қолданушыларына азаматтар арыз жазып жатыр. Солай қамалған қарағандылық модель Алика Мухамадиеваға (Alika_Augustovа) Қылмыстық кодекстің 174-бабы («Әлеуметтік, ұлттық, рулық, нәсілдік, таптық немесе діни алауыздықты қоздыру») бойынша іс қозғалды.
Әлеуметтік желіде тарап кеткен суреттерге қарасақ, Алика Мухамадиева әуелі «полукалбитский диалог» деп, «жартылай қарабайырлардың диалогы» деп кемсіте сөз бастайды.
«Ең сорақысы – «қазақша сөйле!» деп бақырып (ред. Түпнұсқада «кө…ін жартып» деп, дөрекі сөз жазылған), жанын салып жүрген қазақтардың ақыры өздері осылай сөйлеп жүргенін көру…», — деп жазылған.
Артынша Алика Мухамадиева кешірім сұрап бейнежазба жариялады.
Желі қолданушылары бұл жазбаларды ұлт арасына іріткі салатын әрі ұлттық намысқа тиетін сөз деп бағалап, шағым түсірген еді.
