Қазақстандық белгілі кинорежиссер Ардақ Әмірқұлов өмірден өтті

АСТАНА. 5 тамыз. Қазақ киносында өзіндік айтарлықтай орны бар талантты кинорежиссер Ардақ Әмірқұловтың жүрегі 71 жасында соғуын тоқтатты. Бұл туралы Zakon.kz ақпарына сілтеме жасаған rast.kz хабарлайды.

Қайғылы оқиға бүгін, 5 тамыз күні Мәдениет және ақпарат министрлігінің Telegram-арнасында берілген хабар арқылы белгілі болды.

«Қазақстан Республикасының Мәдениет және ақпарат министрлігі көрнекті кинорежиссер Ардақ Әмірқұловтың қайтыс болуына байланысты оның туған-туыстары мен жақындарына, әріптестеріне, шәкірттеріне және барша киносүйер қауымға көңіл айтады», – делінген хабарламада.

Ардақ Жамансарыұлы Әмірқұлов 1955 жылғы 10 желтоқсанда Жамбыл облысы Талас ауданындағы Ақкөл ауылында туған. Ол – Қазақстанның еңбек сіңірген қайраткері (2016), ҚР Мемлекеттік сыйлығының лауреаты (1992). «Құрмет» орденінің иегері (2005).

Ол 1977 жылы педагогикалық институтты бітірген. «Қазақфильм» киностудиясында жұмыс істеді. 1988 жылы Бүкілодақтық мемлекеттік кинематография институтының режиссерлік факультетін С. Соловьевтің класы бойынша тәмамдаған.

1992-2002 жылдары «Қазақфильм» студиясының директоры болды. Алматы театр және көркемсурет институтында (кейінгі – Т.Жүргенов атындағы Қазақ ұлттық өнер академиясы) сабақ берді. 1996 жылы профессор атағын алды.

Бар ғұмырын ұлттық кино өнерін дамытуға арнаған Ардақ Жамансарыұлы Қазақстан кинематографиясының өркендеуіне өлшеусіз үлес қосты. Ол талантты режиссер болумен бірге, білікті ұстаз әрі тәлімгер ретінде бірнеше буын кино мамандарын даярлап шығарып, олардың қалыптасуына ықпал етті.

Ардақ Әмірқұловтың «Отырардың күйреуі» (1991), «Абай» (1995), «Қош бол, Гүлсары!» (2008) секілді фильмдері ұлттық киноның алтын қорына қосылды. Соңғы жылдары түсірген «Үнсіздікте» (2018), «Хирург» (2022), «Жел тоқтаған жер» (2023) атты картиналары да көрермен қауымның ықыласына бөленді. Оның туындыларында ел тарихы, халықтың рухани құндылықтары мен адам тағдыры терең бейнеленіп, кәсіби мамандар тарапынан жоғары баға алды.

Ардақ Жамансарыұлының жарқын бейнесі, өнегелі өмір жолы және қазақ мәдениеті мен кино өнерін дамытуға қосқан елеулі үлесі халық жадында мәңгі сақталады.

Қош бол, кино өнерінің тарланы!