USD
МӘСКЕУ. 5 мамыр. РФ Қауіпсіздік кеңесі басшысының орынбасары Дмитрий Медведев Еревандағы саммитте екі ел басшысының өзара ағылшын тілінде сөйлескендеріне тас-талқан болып ашуланды. Бұл туралы Dialog.ua ақпарына сүйенген rast.kz хабарлайды.
Ереван саммитінде Украина президенті Володимир Зеленський мен Хайастан (Армения) премьер-министрі Никол Пашинян келіссөзді орыс тілінде емес, ағылшын тілінде жүргізді. Олардың мұнысы Димонның аузынан ақ көбігі ағып, екеуін де тілдей жөнелуіне басты себепкер болды.
Алдымен Зеленськийдің Арменияға сапарының өзі Мәскеудің қатты ашу-ызасын туғызды.
Ресейдің бұрынғы премьер-министрі Дмитрий Медведев Ереванда өткен Володимир Зеленський мен Никол Пашинянның кездесуіне үзілді-кесілді пікір білдірді. Ресейлік шенеуніктің бұрқан-талқан болуына Украина президентінің Мәскеудің одақтасы болып табылатын Арменияға сапары тікелей әсер етті.
Кездесудің суреттері жарияланғаннан кейін Медведев екеуін де «руссофоб», яғни «орысты жек көруші» деп атай отырып, оларды мансұқ етіп, қорлайтын жазба жариялады. Ол бұлардың «орыс тілін жақсы біле тұрып, ағылшын тіліне жүгінгендеріне біраз тепсінді.
«Бүгін Ереванда орыс тілінде жақсы сөйлейтін екі мисыз русофоб кемістіктері салдарынан өздері нашар білетін ағылшын тілінде сөйлесті», – деп қаламын сүйкетті ол.
Армения ресми түрде әзірге Ресейдің ҰҚШҰ-дағы одақтасы болып қала береді, бірақ соңғы жылдары ол Кремльден едәуір алыстай бастады. Ресеймен соғысып жатқан Украина президентінің Ереванға келуі Мәскеу үшін ауыр соққы болды және жүйке реакциясын тудырды.
«Кремль үшін Зеленськийдің Арменияда пайда болуы ғана емес, сонымен бірге кездесудегі символикасы да ауыр тиді. Ереван Мәскеуден еш қаймықпай Киевпен тікелей сөйлесуге дайын екенін көрсетті», дейді сарапшылар.
