USD
МӘСКЕУ. 28 наурыз. Ресейдің «Комсомольская правда» газетінің әскери Z-тілшісі Григорий Кубатьян Кремльді Украинамен келісімге келуге шақырды. Бұл туралы Dialog.ua ақпарына сүйенген rast.kz хабарлайды.
Тағы бір танымал ресейлік насихатшы Григорий Кубатьян «жолынан жығылып», соғысты жедел тоқтату жөнінде мәлімдеме жасады.
Соғыстың бесінші жылға қараған шағында Z-патриоттар қатары айнуға көшті, арасында айқын күйреу күйіне түскендер көбейіп келеді. Олар Украинаға қарсы соғыста енді жеңіске жетудің мүмкін емес екенін анық түсініп, Кремльді қанды қасапты тоқтатуға ашық түрде шақыра бастады.
Dialog.ua хабарлағандай, «Комсомольская правда» газетінің Кремльді жақтайтын Z әскери тілшісі Григорий Кубатьян 27 наурыздың кешінде Telegram-да осы тақырыпта мақала жариялады.
Мәтбұғат журналисі билеуші элита арасында «СВО» деп аталатын нәрсеге қатысты консенсус жоқ екенін мәлімдеді. Кейбір «элита» соғыстан пайда көріп, оның жалғасқанын қалайды, ал кейбіреулері бүйтіп босқа шығынға ұшырай бергенше, мүмкіндігінше тезірек бейбітшілік туралы келіссөздер жүргізгенді жөн көреді. Негізі, екі жағы да тек өз мүдделері туралы ойлайды.
Сонымен қатар, Григорий Кубатьян Украина дрондары Ресейдің стратегиялық нысандарын жиі дәл нысанаға алып жатқандарын атап өтті.
«Мүмкін келіссөздер қажет шығар. Өмірді сақтап қалу үшін соғыста не жеңу, не оны тоқтату керек. Соңғы төрт жылда біз жеңе алмадық немесе жеңгіміз де келмеді. Сондықтан келіссөздер жүргізуге тура келеді. Соғысты шексіз жүргізу мүмкін емес», – деп жазды насихатшы.
Ол армия мен Ресей қоғамының рухын төрт жыл бойы жүрген мағынасыз «қанды қасаптың» бұзып жібергенін атап өтті.
Григорий Кубатьян сонымен қатар Кремльдің Украина мен бүкіл Батыстың күйреуін күтіп, соғысты созуды жалғастыру жоспары Ресей үшін жақсы аяқталатынына күмән келтірді.
