USD
ҚЫЗЫЛОРДА. 21 қазан. Кешелі бері Қызылорда облысында сөре тартқан Халықаралық волонтерлер апталығы Арал ауданының Қамыстыбас ауылында жалғасын тапты. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Табиғатты қорғау бүгінгі күннің міндеті ғана емес, сонымен қатар келер ұрпақ алдындағы ортақ жауапкершілік екенін насихаттауға арналған
маңызды бастама – «Green Aral: Volunteers For Life 2026» халықаралық волонтерлер апталығы Арал ауданына қарасты Қамыстыбас ауылдық округіне қарай ойысты. Қызылорда қаласында басталған ауқымды шараға қатысушы табиғат жанашырлары мен белсенді волонтерлер көл жағасында бас қосты.
Көгілдір көлдің жағасында ұйымдастырылған еркін форматтағы кездесудің негізгі мақсаты волонтерлер қозғалысын дамыту, жастар арасында экологиялық мәдениетті қалыптастыру және қоршаған ортаны қорғау ісіндегі ортақ жауапкершілікті нығайту болмақ.
Мазмұнды кездесу барысында жастарға қазақ халқының ұлттық дәстүрлері мен тағамдары, тарихи жәдігерлері мен мәдени мұрасы таныстырылып, өнерпаздар ән мен жырдан шашу тарту етті.
Кездесуде облыстық қоғамдық даму басқармасы басшысының орынбасары Дәурен Тілеумбетов сөз сөйлеп, халықаралық волонтерлер апталығының маңыздылығына тоқталды. Ол еріктілік қызметтің қоғамды ізгілікке ұйыстырудағы рөлін атап өтіп, жастардың табиғатты қорғау мен қоғамдық жұмыстарға белсенді араласуының маңызын жеткізді. Сондай-ақ, ортақ мақсат жолында бас қосқан қатысушыларға сәттілік тілеп, бастаманың нәтижелі болуына ізгі ниет білдірді.
Басқосу барысында жастардың өзара қарым-қатынасын нығайтуға, еркін пікір алмасуға бағытталған концерттік бағдарлама ұйымдастырылды.
Өзбекстаннан, Қырғызстаннан және Қазақстанның барлық өңірінен келген қатысушыларды біріктірген бұл еркін форматтағы басқосу тәжірибе алмасып қана қоймай, жаңа бастамаларға жол ашатын маңызды алаңға айналмақ.
