USD
ГРОЗНЫЙ. 8 тамыз. Шешенстан басшысы Рамзан Кадыров өзінің үлкен ұлы – Ахмат Кадыровты да «Шешен Республикасының батыры» атағымен марапаттады. Бұл туралы The Moscow Times ақпарына сілтеме жасаған rast.kz хабарлайды.
ТАСС-тың хабарлауынша, Шешенстан үкіметінің райысы Магомед Даудов өз республикаларында осындай жаңалықтың орын алып жатқанын жеткізген.
Ол Ахмат Кадыровқа награданың республика алдында сіңірген еңбегі үшін берілгенін айтып, бұлардың қатарында денешынықтыру мен салауатты тұрмыс салтын таратуға қосқан үлестерін атап өткен.
Ахмат Кадыровтың жасы бар болғаны 20-да. Ол 2024 жылғы мамыр айынан бері Шешенстанның денешынықтыру және спорт министрлігін басқарып келеді, ал 2026 жылғы қаңтарда республика үкіметі төрағасының орынбасары лауазымына қоса тағайындалды.
2026 жылғы наурызда Ресей президенті Владимир Путин Ахмат Кадыровқа көп жылғы лайықты жұмысы үшін алғыс жариялады.
Бұған дейін Кадыровтың қамауда қол-аяғы байлаулы тұтқынды ұратын келесі ұлы, Ахматтың інісі – Адам Кадыров 2023 жылғы қазанда 15 жасында «Шешенстан Республикасының батыры» атағын алған болатын. Ол екінші мәрте осы атақпен 2026 жылғы 12 маусымда марапатталды. Бұл жолы оған награда «Украинадағы соғысқа қолдау білдіргені үшін» берілді. Ол да қазір бірнеше жұмысты атқарып жүр. Соның ішінде Шешенстан қауіпсіздік кеңесінің хатшысы болып саналады.
«Верстка» басылымының мәліметі бойынша, соғыс басталғалы бері Рамзан Кадыровтың отбасы мүшелері 150-ге жуық әртүрлі деңгейдегі марапаттарды алып үлгерген. Би-би-си агенттігінің жазуынша, Кадыровтың 80-нен астам туыстары қазір Шешенстанда басшылық қызметтер атқарып келеді.
