USD
ДЖАКАРТА. 2 қазан. Индонезияда өткен футбол матчынан кейін стадионда орын алған жаппай тәртіпсіздікте аяқ астында қалған 130 адам жан тапсырды. Бұл туралы «Спорт24» хабарлады.
Кездесу Persebaya Surabaya және Arema командалары арасында өткен.
Sky News таблоидының жазуынша, жанкүйерлер Arema 2:3 болып ұтылғаннан кейін алаңға шығып кетті.
Қайғылы оқиға Шығыс Ява аралындағы стадионда тіркелген. Мұндағы жанталаста жанкүйерлердің өздерінен бөлек, екі полицей қаза тапқан. Зардап шеккендердің арасында Arema командасының екі ойыншысы да бар. Анықталмаған дерек бойынша, көз жұмғандардың бірі бес жасар бала көрінеді.
Ойын аяқталғаннан кейін алаңға жүгіріп шыққан Arema жанкүйерлері жаппай тәртіпсіздіктерді бастап кеткен. Сол кезде полицейлер оларға көзден жас ағызатын газ қолданған. Осыдан кейін жұрт кері қарай қашып, бірін-бірі басу оқиғасына жол берілген.
Көргендердің айтуларынша, алаңдағылардың көпшілігі естерінен танып қалған, тобыр олардың үстерінен басып өткен.
Шығыс Ява полициясының бастығы Нико Афинта тағы 180-ге жуық адамның жарақат алып қалғанын айтты. Олардың көпшілігінің жағдайлары ауыр, біртіндеп нашарлап бара жатқандары бар. Бірқатары бастан қатты жарақат алған.
Денсаулық сақтау министрлігі жергілікті шенеунігінің айтуынша, құрбандыққа ұшырағандардың көбі тұншығып өлген.
