Футбол. «Астана» командасы «Ордабасыны» жеңіп, Суперкубок алды

АСТАНА. 25 ақпан. «Астана-Арена» спорт кешенінде «Астана» Шымкенттің «Ордабасы» командасын 2:1 есебімен ұтып, Қазақстан Суперкубогын жеңіп алды. Бұл туралы rast.kz хабарлады.

«Астана» өткен 2022 жылғы футбол маусымында еліміздің чемпионы атанса, «Ордабасы» Қазақстан Кубогын жеңіп алған еді.

Бірінші таймда командалар матчтағы барлық голдарын соғып үлгерді. Әуелі 8-минутта Алекса Аманович есеп ашып, «Астананы» алға шығарды. Арада бір минут өтер-өтпесте шымкенттіктер таразы басын теңестірді. Оны шұғыл қарсы шабуыл барысында Еркебұлан Тұңғышбаев баспен ұрып түсірді. Ал 38-минутта «Ордабасы» қақпасына пенальти белгіленді. Оны Дембо Дарбо жақсы пайдалана білді.

Есеп осыдан кейін кездесу соңына дейін өзгерген жоқ.

Бүгін сондай-ақ Санкт-Петербургтің «Зениті» Ульяновскіде жергілікті «Волгамен» Ресей Кубогының 1/32 финалдық ойынын өткізіп, 3:0 есебімен жеңіске жетті. Матчқа жеңімпаздар сапында қазақстандық Нұралы Әліп бастан-аяқ қатысты.

Осы күні сол сияқты Ташкентте «Пахтакор» мен Алматының «Қайраты» жолдастық кездесу өткізді. Матч 4:3 (2:1) есебімен алаң иелерінің пайдасына шешілді.