USD
МӘСКЕУ. 2 шілде. Ресей тергеу комитеті елдің еркін күрестен жастар құрамасының жаттықтырушысы Алишер Исматзоданы террористік әрекетке жәрдемдесті деген айыппен қамауға алды. Бұл туралы РБК ақпарына сүйенген rast.kz хабарлайды.
Енді Мәскеудің Щерба соты спортшыға қатысты материалдарды қарайды. «Исматзоданы тұтқындау туралы өтінішпен бір мезгілде сотқа оның үйін тінту туралы да өтініш түсті», деп түсіндіреді RTVI.
Жаттықтырушыға Ресей Федерациясының Қылмыстық кодексі 205.1-бабының 1-бөлігі (террористік әрекетке жәрдемдесу) бойынша айып тағылып отыр. Оған 7 жылдан 15 жылға дейін колонияда отыру қаупі төніп тұр. Бұған қоса, айыппұл төлейді.
Сот баспасөз қызметі іс фигурантының толық аты-жөні «Алишери Камаледин Исматзода» екенін де атап көрсетті. Оның тегіне қарағанда, тәжік ұлтының өкілі екенін байқауға болады.
Ресей спорттық күрес федерациясында басылым Исматзода ұсталғанын растады. «Біз үшін бұл ақпарат таң қалдырды, бірақ, өкінішке қарай, солай болып қалды», – деп түсіндірді федерация өкілдері.
Алишери Исматзода 1992 жылы туған. Ол спорт шебері, жоғары санатты жаттықтырушы. Соңғы уақыттары № 1 Мәскеу олимпиадалық резервінің орта арнайы мектебінде жаттықтырушы, сонымен қатар Ресей жасөспірімдер құрамасы (16 жасқа дейінгі қыздар) мен Мәскеу жасөспірімдер құрамасында (16 жасқа дейінгі бозбалалар) жаттықтырушы болып жұмыс істеген.
Биылғы мамыр айында өткен 15 жастан кішілер арасындағы Еуропа чемпионатында Исмотзоданың басшылығымен Муса Сантиков алтын медаль жеңіп алған екен.
