USD
ДАНАНГ. 27 мамыр. Вьетнамның Дананг қаласында мәреге жеткен Азияның 23-ке дейінгі жастар арасындағы чемпионатының соңғы күні үш палуанымыз алтын медаль жеңіп алды. Бұл туралы Nur.kz ақпарына сүйенген rast.kz хабарлайды.
Кеше, сейсенбі күні чемпионатта 7 медаль жиынтығы сарапқа салынды
Кілемге еркін күрес шеберлері шықты. Жаңа, 125 келіге дейінгі салмаққа ауысқан Ризабек Айтмұхан (суретте) финалдық белдесуді жеңіспен аяқтады. Ол турнирде үш рет қарсыластарынан басым түсті.
61 келіге дейінгі салмақтағы Нұрданат Айтанов та үш бәсекелесінен айласын асырды. Ол финалда Үндістан өкілі Дипак Дипакты ұтты.
Бұдан кейін кезек 74 келіге дейінгі салмақтағы Нұрдәулет Сейілбековке келді. Ол төрт белдесуінде де қарсыластарын бет қаратпай жеңді. Ең соңынан қырғыз Әділет Ақылбековтен айласын асыра білді.
Құрлық чемпионатында Ерхан Әбіл (49 кг) мен Абылайхан Үзембаев (86 кг) – күміс, Шаттық Әлайдар (65 кг) қола медальдардың иегерлері атанды.
Осылайша, Қазақстанның еркін күрестен жастар арасындағы құрамасы Вьетнам жерінен үш алтын, екі күміс және бір қола медаль алып келе жатыр. Ол командалық есепте алдына тек Үндістан палуандарын ғана жіберіп алды.
Ал грек-рим күресі мен әйелдер күресін қоса алсақ, еліміздің жастары Азия біріншілігінде 7 алтын, 10 күміс және 5 қола медальге қол жеткізді.
