USD
АСТАНА. 9 тамыз. Қазақстанда дәрігерлердің қабылдау ережелері өзгерді: бұдан былай пациент терапевттің «көмегінсіз-ақ» бірден көздеген дәрігеріне жазыла алады. Бұл туралы «24KZ» ақпарына сілтеме жасаған rast.kz хабарлайды.
Қазақстанда дәрігерлердің қабылдау ережелері өзгерді, жаңа тәртіп 3 тамыздан өзінің заңды күшіне енді. Бұдан былай нақты мамандар терапевт дәрігерлерді араға салмай-ақ, пациентті қаралу немесе консультация алу үшін басқа тиісті медиктерге жібере алады. Бұл өзгеріс осы уақытқа дейін ұзақ жылдар бойы орын алып келген бюрократия мен созбұйдалықты жояды. Сөйтіп, пациенттің тексерілмек болып келген медицина қызметкеріне тезірек жетуіне жол ашып береді.
Ал амбулаториялық жағдайда мамандандырылған медициналық көмек көрсету ережелері іске қосылады.
Естеріңізге сала кетейік, бұған дейін азаматтар қандайда бір тексерулерге жолдама алу үшін алдымен терапевтке қайта-қайта жазылып, тек соның жазып берген «ішірткісі» арқылы ғана өзіне керекті дәрігеріне барып келетін еді. Енді ондай төрешілдіктің тамырына балта шабылды. Бұдан былай қараушы дәрігер науқастың қосымша тексерілуі үшін өз бетінше жолдама бере алатын болды. Бірақ тек үш маманға ғана жібере алады.
Бұдан бөлек, емханалар енді 60 күнтізбелік күн бұрын дәрігерлерді қабылдау кестесін жариялауға және кесте өзгерген кезде оларды жаңартуға міндетті. Бұрын жазба тек 7-10 күнге ғана қолжетімді болатын.
Пациент кеселінің мәртебесі жүйесіне де тиісті өзгерістер енгізілді. Олар «сау», «сауығу үстінде», «жақсаруда», «өзгеріссіз», «нашарлау үстінде», «өлім жағдайында», сондай-ақ «ауруы жалғасуда» деп аталады. Бұрын «тұрақты ауыр», «тұрақты өте ауыр» секілді атаулар қолданылатын.
Соңғы мәртебе дәрігерге пациентті жаңа жолдама алу үшін терапевтке жібермей, өзін-өзі қайта тағайындауға мүмкіндік береді.
Сондай-ақ қабылдау мен процедура уақыттарының нормалары бекітілді. Мысалы, маманның науқасқа кеңес беретін уақыты 20 минуттан кем болмауға тиіс, сол сияқты ультрадыбыстық зерттеу 20 минутқа созылуы керек, ал алғашқы қабылдау кезінде уақытты 30 минутқа дейін ұзартуға болады.
