USD
АСТАНА. 25 қыркүйек. Әлемге әйгілі әнші Димаш Құдайберген Ақтау маңында өткен әскери оқу-жаттығу кезінде апатқа ұшырап, мезгілсіз көз жұмған жауынгерлердің қазасына орай қайғырып көңіл қосын білдірді. Бұл туралы Politico.kz ақпарына сілтеме жасаған rast.kz хабарлайды.
Димаш: «Інілерімді қимай жүрегім ауырып тұр» деді ағынан жарылып.
Өнер иесі желідегі парақшасында қаралы оқиғаның жүрегіне ауыр тигенін жазып, қыршын кеткен 18–19 жастағы боздақтардың ата-аналарына сабыр тіледі.
«Біздің Ақтауда көз жұмған 18-19 жасар інілерімді қимай жүрегім ауырып, айтуға сөз таба алмай отырмын. Балалық кезеңнен енді ғана шығып келе жатқан кезде жап-жас ғұмырлардың осылайша үзіліп кеткені… Қаза болған бауырларымыздың ата-анасына, туған-туыстарына, жақындарына шын жүректен көңіл айтамын. Алла жүректеріңізге сабыр, өздеріңізге күш берсін», – деп жазды ол.
Димаш Құдайберген бұған қоса мұндай ауыр қасіреттің елімізде енді қайталанбауын тілеп, қаза болған бауырларымен қайырласты.
«Інілерімнің жатқан жері жайлы, топырағы торқа болсын. Жандары жәннатта болсын. Е Алла, құдіреті күшті Алла, інілерімді алдынан жарылқағайсың. Ешбір ата-ана баласының артында қалмасын… Елімізде мұндай қасірет енді қайталанбасын. Қош болыңдар, бауырларым», – деген тілек қалдырды ол қоштасу сөзінде.
