USD
ЛОНДОН. 2 шілде. Англияға аман-есен жетіп алған Қазақстан құрамасы мен «Челси» командасының шабуылшысы Дастан Сәтбаев ағылшын клубына ауысуының қалай шындыққа айналғанын түсінген сәтті есіне алды. Бұл туралы Vesti.kz ақпарына сүйенген rast.kz хабарлайды.
17 жастағы форвардтың айтуынша, өзінің «Челсиден» шақыру алғанын әуелгіде тек ең жақын адамдары ғана білген. Алайда оның өзі Еуропадағы ең мықты клубтардың бірінде өзін дәлелдеуге мүмкіндік берілгеніне ұзақ уақыт сене алмайды.
«Алғаш рет тек ата-анам білді. Мен өзіммен өзім ойға шомып, мұның қалай мүмкін болып отырғанына санам жетпеді. Бірақ егер бұл рас болса, мен дұрыс бағытта жүр екенмін деп шештім, сосын сынақтан өтуге дайындалып, бұрынғыдан да көп жұмыс істей бастадым. Мен қатты қуанышта едім, бір жабайы толқу бойымды кернеді, өйткені қалай дегенде де, бұл Еуропа ғой, менде бұрын өзімнің бірінші және жалғыз клубым – «Қайраттан» басқа ешкімде сынақтан өту болған жоқ. Алаңсыз дайындалдым, әкеммен келіп едім, сынақтан да өттім. Ол байқау ойынынан тұрды, мен сол матчта үш гол соға алдым. Жаттығудан кейін мені «Челсидің» директоры өзіне шақырды, негізгі базаны көрсетіп, ауысуға байланысты: «Енді біз мәселені агентпен және сенің клубыңмен талқылайтын боламыз» деді. Менің өздеріне ұнағанымды, мені өз қолдарына алуға дайын екендерін айтты», – деді футболшы YouTube-арнасындағы Kairat TV-да.
Дастан 2024 жылдың қараша айында «Челсидің» академиясында екі апталық байқаудан өтті. Ал арада бірнеше ай өткесін, 2025 жылдың ақпанында Лондон клубы қазақстандық футболшының трансферін ресми түрде бекітіп, оның өзімен келісімге отырды.
Қазіргі таңда Сәтбаев «Челсидің» базасында жаттығуды бастап, жаңа маусым алдындағы бейімделу кезеңін өткеріп жатыр. Бұған дейін команданың жаңа бас жаттықтырушысы Хаби Алонсоның Азиядағы турне басталғанға дейінгі бірнеше апта бұрын қазақ футболшысымен жұмыс істесіп көретіні хабарланған болатын.
Дастанның «Челсидің» ойыншысы ретіндегі ресми тұсаукесері форвард тамыз айында 18-ге толғаннан кейін өтеді және оның ағылшын клубымен контрактісі сол кезде күшіне енеді.
Еске сала кетейік, «Челси» Дастан Сәтбаевты «Қайраттан» 4,3 млн еуроға сатып алды. Бұл – біздің футбол үшін рекорд.
Дастан «Қайраттың» сапындағы екі жылдық маусымында 58 матчқа қатысып, 26 гол соқты және 9 ассист жасады.
