USD
МИЛАН. 6 қараша. Италияның Милан қаласында Чемпиондар лигасының кезекті тур ойынын жергілікті «Интермен» өткізген Алматының «Қайраты» 1:2 есебімен ұтылып қалды. Бұл туралы «Футбол на Куличках» сайты ақпарына сүйенген rast.kz хабарлайды.
Матч барысында «Интер» лиганың биылғы маусымдағы бірінші голын өз қақпасына жіберіп алды. Ол бұған дейінгі үш кездесуде де дарбазасы құлпын ешкімге аштырмап еді.
«Интер» (Милан) – «Қайрат» (Алматы) 2:1 (1:0)
Милан. «Джузеппе Меацца» стадионы. 69 983 көрермен.
Төреші: Луиш Годиньо (Португалия)
«Интер»: Ян Зоммер, Дензел Думфрис, Ян Биссек (Мануэль Аканджи, 81), Стефан де Врей, Карлос Аугусто, Федерико Димарко, Давиде Фраттези (Петар Сучич, 63), Николо Барелла (Хакан Чалханоглу, 71), Петр Зелинський, Лаутаро Мартинес (Анж-Йоан Бонни, 46), Франческо Эспозито (Маркус Тюрам, 71).
«Қайрат»: Темірлан Анарбеков, Александр Мрынский, Александр Широбоков, Егор Сорокин, Луиш Мата, Дамир Қасаболат (Әділет Сәдібеков, 76), Офри Арад (Олжас Байбек, 71), Валерий Громыко (Еркін Тапалов, 46), Жоржиньо (Георгий Зария, 76), Дастан Сәтбаев, Эдмилсон Сантос (Рикардиньо, 71).
Голдар: Лаутаро Мартинес (45), Офри Арад (55), Карлос Аугусто (67).
Ескертулер: Жоржиньо (6), Николо Барелла (58).
Ойын тартысқа толы болды. Айтатыны жоқ, «Қайрат» оны өте лайықты өткізді. Алматылықтар таяуда ойналған Мадридтің «Реалымен» кездесуімен салыстырғанда, бұл жолы әлдеқайда өзгеше ойын өрнегін көрсетті. Команда жігіттері қарсыластар алаңында ойнағандарына қарамастан, терең қорғанысқа кетіп, жатып алған жоқ, қайта керісінше мүмкіндік болған бойда қарсы шабуылға шығып, әріптестерінің әлеуетін байқап көруге ұмтылды.
Матчта қайраттықтардың ойыннан ойынға көтеріліп, қалыптасып келе жатқаны анық байқалды. Егер сәттілік бірер сәт уыстан шығып кетпегенде, олар Миланның төрінен де бір ұпай алып қайтатындай хәлге тым жақын тұрды.
Кездесудің дебютінде алаң иелерінің екпіні мен қысымы қатты байқалды. Бұған қонақтар төтеп бере алды. Мұнымен де шектелген жоқ, енді әлсін-әлсін алға қарай ытырылып шығып, қарсы қақпаны қарауылға ала бастады. Сондай сәттің бірінде Дастан Сәтбаев гол соғыс кете жаздады. Оның сұрапыл соққысы қақпа маңдайшасына тиіп барып, ары қарай кеті.
Арада бір минут өткеннен кейін «Интер» есеп ашып үлгерді. Осы тұста алаң иелері меймандардың абдырап қалғандарын жақсы пайдалана білді. Бірақ сол кездің өзінде қақпашы Темірлан Анарбеков үш рет сейв жасап жіберді.
Екінші таймның бас жағында интерліктер есепті ұлғайта түсуге барынша күш салып бақты. Ал алматылықтар негізгі ойынның ордасын алаң ортасына қарай ауыстыруға тырысты.
Мұның соңы көп ұзамай қонақтардың таразы басын теңестіріп кетулеріне барып ұласты. Матчтың 55-минутында «Қайрат» күтпеген жерден жауап доп соқты. Оны айып алаңында тұрған Офри Арад баспен ұрып кіргізді.
Бұл гол миландықтарды састырып тастады. Сосын олардың өз-өздеріне келулері үшін де біраз уақыт керек болды. Сөйтіп, шабуылды үдетті. Енді ойынның дені біздің жігіттердің алаңында өте бастады. Сондай қарбалас сәттердің Карлос Аугусто айып алаңының сыртынан қатты соққы жасап, допты тордан бір-ақ шығарды. Оған Темірлан ұмтылғанымен, жете алмады.
Бұдан кейін «Интер» біршама босап, «Қайрат» ойыншыларының таблодағы есепті өзгертулеріне мүмкіндік беріп қойды. Алайда есеп өзгермеген қалпы қалды. Осылайша бір доп айырымымен ұтылған қайраттықтар өз жанкүйерлері мен мамандардың жақсы бағасын салды.
Қақпашы Темірлан Анарбеков матчтың үздік ойыншысы атанды.
Осы жеңістен кейін ұпай қорын 12-ге жеткізген «Интер» топ бастаушылар сапындағы үшінші орнын сақтап қалды.
Енді келесі турлың ойындары 25-26 қараша күндері ойналады. «Қайрат» 26 қарашада Данияда «Копенгаген» командасымен кездеседі.
