USD
БАНГКОК. 31 мамыр. Бангкокта өтіп жатқан олимпиялық лизенциялық турнирде 63,5 кг салмақтағы саңлағымыз Мұхаммедсабыр Базарбайұлы кубалық қарсыласына есе беріп қойды. Бұл туралы Vesti.kz ақпарына сүйенген rast.kz хабарлайды.
Таиланд байтағындағы іріктеу жарысы 24 мамырда басталды, ол 2 маусым күні мәреге жетеді. Бұл – Олимпиада алдындағы ең соңғы електік бәсеке.
Турнирге Африкадан – 25, Америкадан – 27, Азиядан – 31, Еуропадан – 39, Океания аймағынан – 9 мемлекеттің, барлығы 131 елдің 578 боксшысы қатысып жатыр.
Біздің Мұхаммедсабыр жартылай финалда әлемнің 2023 жылғы чемпионатының күміс жүлдегері, кубалық Эрисланди Альвареспен қолғап түйістірді. Жекпе-жек тартысты өтті. Соңында Бостандық аралының өкілі төрешілердің шешімімен жеңіске жетті.
Дегенмен, біздің былғары қолғап шеберінің Ойындарға жолдама алуға әлі де үміті бар. Бұл үшін ол өзі сияқты ширек финалда қалып қойған үш боксшының арасында үздік болып шығуы керек. Енді сол 4 атлет жұбаныш турнирінде өзара күш сынасады. Егер ондағы екі жекпе-жегін де жеңіспен аяқтаса, Мұхаммедсабыр өз салмағындағы соңғы, бесінші квотаға ие болады.
Осы күні сондай-ақ 50 келіге дейінгі салмақтағы жерлесіміз, әлемнің екі дүркін чемпионы Назым Қызайбай кореялық Жух Юнг Жунды 5:0 есебімен жеңді. Енді ол 1/8 финалда бағын сынайды.
Айта кетуіміз керек, турнирде бұл салмаққа 4 квота берілгелі отыр. Яғни жартылай финалға шыққан 4 боксшы ғана Олимпиадаға лицензия ала алады.
Бүгінгі жекпе-жектер Qazsport телеарнасының сайтында тікелей эфирде көрсетілді.
Суретте: Мұхаммедсабыр Базарбайұлы кубалық Эрисланди Альвареспен жекпе-жек кезінде
