USD
ЛИВЕРПУЛЬ. 5 қыркүйек. Кеше басталған әлем чемпионатын жігіттеріміз жеңімпен, ал қыздарымыз жеңіліспен ашты. Бұл туралы Vesti.kz ақпарына сүйенген rast.kz хабарлайды.
Турнирде 90 келіге дейінгі салмақта жүлдені сарапқа салып жатқан Сағындық Тоғамбай (суретте) ағылшын былғары қолғап шеберімен қолғап түйістірді. Біздің атлет ринг иесін кэмбек арқылы жеңді. Анықтап айтқанда, жекпе-жектің басында жеңіліп тұрып, ақырында ұтып шықты. Төрешілер бірінші раундта жеңісті 4:1 есебімен оның қарсыласына берді. Бірақ бұдан кейінгі раундтарға Сағындық оппонентіне еш мүмкіндік қалдырмады. Ол екінші раундта 3:2 етіп ұтса, соңында 5:0 есебімен алға шықты.
Сағындық Тоғамбай – Азияның 2024 жылғы чемпионы, 2022 жылғы Азия ойындары мен чемпионатының қола жүлдегері.
Турнирде бұған дейін 54 келіге дейінгі салмақтағы қазақстандық Элина Базарова өзбекстандық Нигина Уктамовамен жұдырықтасып, жеңіліп қалған болатын. Ол шайқас барысында бір рет нокдаун алып қалып, жалпы есепте 0:5 болып жеңіліске ұшырады.
Бокстан әлем чемпионатын кешеден бері QazSport телеарнасы көрсетіп тұр. Бүгін арна Астана уақытымен сағат 14:55-те және 21:55-те трансляция жасайды. Ал 03:10 сағатта турнирдің іріктеу жекпе-жектеріне шолу жасалады.
Чемпионат 4-14 қыркүйек аралығында өтеді.
Қазақстан құрамасы біріншілікке толық құрамда қатысып жатыр. Жалпы, біріншілкке әлемнің 66 елінен 540 боксшы келді.
Енді World Boxing ұйымының аясында өтетін бірінші әлем чемпионаты – қазақ боксының қазіргі деңгейін айқындайтын басты сын болмақ.
