USD
ОРАЛ. 19 қыркүйек. Басқыншы Ресей армиясы сапында соғысып жүрген оралдық жігіт Украина жерінде абыройсыз қазаға ұшырады. Бұл туралы «Мой город» ақпарына сүйенген rast.kz хабарлайды.
Батыс Қазақстан облысының тумасы 2023 жылы өз еркімен Ресей қарулы күштері құрамына жазылған екен. Қоғам белсенділері әлеуметтік желілерде сондай ақпар таратып жатыр.
Оралдық белгілі журналист Лұқпан Ахмедьяров өзінің Instagram-дағы парақшасында Батыс Қазақстан облысының тағы бір тумасының Украина жерінде Ресей үшін жантәсілім еткенін баяндады. Ол 41 жастағы Айбек Рамазанов деген азамат болып шықты. Автордың жазуынша, жігіт 2023 жылы өз еркімен Ресей қарулы күштері қатарына жазылып кіріп, артынша Украинадағы соғысқа аттанған. Паспорттағы мерзіміне қарағанда, Рамазанов құжатты 2024 жылғы 2 тамызда алған. Құжатты оған «Донецк халық республикасы» деген әлемде еш жерде мойындалмаған құрылым берген.
Ахмедьяровтың айтуынша, Айбек бұрын, Батыс Қазақстан облысында жүргенінде «Жайық мұнай» компаниясында жұмыс істеген. Шамасы, мұнда тауып жатқан айлық жалақысы қанағаттандырмаса керек, орыстар жағында соғысып, «қырғын ақшаның астында қалғысы» келіп, соғысқа жанын жалдап барыпты. Алайда компаниядағылар журналистке өздерінің бұрынғы қызметкерлері жайлы сұхбат беруден үзілді-кесілді бас тартыпты.
Атап өтуіміз керек, Қазақстан азаматтарына басқа елдерде болып жататын қарулы қақтығыстарға қатысуға тыйым салынған. ҚР Қылмыстық кодексінің «Шетелдік қарулы қақтығыстарға қатысу» деп аталатын 172-бабында «Қазақстан Республикасы азаматының шет мемлекеттің аумағындағы қарулы қақтығысқа немесе соғыс қимылдарына жалдамалылық белгілері болмаған кезде қасақана құқыққа сыйымсыз қатысуы – бес жылдан тоғыз жылға дейінгі мерзімге бас бостандығынан айыруға» жазаланатыны атап көрсетілген. Бірақ республика полицейлері Рамазановқа қатысты осындай қылмыстық іс қозғады ма, жоқ па, ол жағы әзірге белгісіз. Себебі, Ресей армиясы қатарына кірген кезінде оның әлі Қазақстан Республикасының азаматы болып тұрғаны айдан анық. Ал полиция департаментінлегілер бұл мәселеге байланысты жауапты кейінірек беретіндерін мәлімдеген.
Еске сала кетейік, бұл Батыс Қазақстан облысы азаматының басқыншы орыс армиясы сапында Украинаға қарсы соғысқа қатысып, жаһаннамға аттанып кеткен бірінші жағдайы емес. Бұдан бұрын Лұқпан Ахмедьяров Украинадағы қанды қасапта Бөрлі ауданының 61 жастағы тұрғынының Украинадағы ұрыстар кезінде қаза тапқанын хабарлаған еді. Бұдан артын тағы қандай ақымақтық болады! Ол 2023 жылдың қарашасында Ресейге кетіп қалған екен. Бара салып РФ азаматтығын алған азамат жасының ұлғайып қалғанына қарамастан, импершіл Путиннің оккупациялық армиясы қатарына қабылданыпты, сол бойда майданға жіберілген сақа солдат «Град» қондырғысының көздеушісі болып соғысқа кірісіпті. Бірақ 2024 жылғы қаңтарда жарақат алып қалады да, тез жазылып, қайтадан шайқастарға қосылады. Содан кейін ақпан айынан тамызға дейін байланысқа шықпай қалады. Сосын туыстары оны хабар-ошарсыз кеткендер қатарына жатқызып жүреді. Ал тамызда ер кісі қызмет еткен бөлімшенің командирі оның әйеліне хабарласып, сүйегі табылып, Ростов қаласындағы мәйітханаға жіберілгенін жеткізеді.
2024 жылдың мамыр айында Батыс Қазақстан облысының тағы бір тумасы – Павел Забродиннің РФ армиясы сапында Украинада соғысып жүріп, опат болғаны жөнінде ақпар келді. Ол Чапаев (қазіргі – Ақжайық) ауданында туып-өскен. Мектеп бітіргеннен кейін Тольяттидегі әскери училищеге оқуға түседі, соңынан Мәскеуге қызмет етуге жіберіледі. Армияда бір жыл болып, лейтенант атағын алады. Ал соғысқа резервтегі офицер ретінде шақырылып, аттандырылған екен.
