USD
ПАФОС. 15 сәуір. Қазақстандық шахматшы қыз Бибісара Асаубаева өзбек гроссмейстері Жавохир Синдаровты турнирдегі жеңісімен ерекше құттықтады. Бұл туралы Offside.kz ақпарына сүйенген rast.kz хабарлайды.
Гәп Кипрдің Пейе қаласында өтіп жатқан ерлер арасындағы 2026 жылғы Үміткерлер турниріндегі басты жеңіс турасында болып отыр.
«Өзбекстандық 20 жастағы гроссмейстер Жавохир Синдаров турнирде мерзімінен бұрын жеңімпаз атанды. Ол 14 сәуір күні өткен 13-турда қара тастармен ойнағанына қарамастан, тегі үндістандық Нидерланд гроссмейстері Аниш Гириді ұтып, 13 мүмкіндіктен 9,5 ұпай жинады. Сөйтіп, жарыстың аяқталуына бір тур қалғанда бірінші орынға толық табан тіреді, себебі одан кейін келе жатқандар енді теориялық жағынан оны қуып жете алмайды», – деп жазды Kun.uz ресурсы.
Осыған байланысты 22 жастағы Бибісара Асаубаева өзінің телеграм-арнасында өзбек шахматшысын ерекше сезіммен құттықтап, екеуі бірге түскен рәсімдерді жариялады.
«Менің чемпионым», – деп кестеледі қазақ қызы жүрекше эмодзиімен бірге.
Бибісара бұдан бұрын да Жавохирмен бірге түскен бірнеше суретін әлеуметтік желіге қойған еді.
Турнирдегі осы жеңісінен кейін Жавохир Синдаров әлем шахмат тәжі үшін шайқасу мүмкіндігіне ие болды. Ол бұл жолда әлемнің қазіргі чемпионы, 19 жасар үнділік гроссмейстер Гукеш Доммараджумен таққа таласады.
Еске сала кетейік, дәл осындай Үміткерлер турнирінің әйелдер арасындағы сайысы Кипрдің Пафос қаласында жүріп жатыр. Ондағы 13-турда Бибісара Асаубаева украинның күшті шахматшысы Анна Музычукті ұтып, көш басындағы үнді қызы Рамешбаба Вайшалиді қуып жетті. Енді біздің қыз соңғы турда Дивья Дешмукхпен кездеседі. Турнирдің тағдырын сол матч шешеді.
