USD
ЕРЕВАН. 7 маусым. Бүгін таңертең Арменияда парламент сайлауы басталды, оның қорытындысы елдің одан әрі даму векторын анықтайды. Бұл туралы DW ақпарына сүйенген rast.kz хабарлайды.
Қазіргі премьер-министр Никол Пашинян өз орнына қайта сайлануға өте зор үмітті. Мұнда оның басты қарсыласы Ресей олигархы Самвел Карапетян болғалы тұр. Дегенмен сайлау нәтижесінің кейбір сұлбалары қазірдің өзінде белгілі сияқты. Бұған дейін бірнеше мәрте жүргізілген сауалнамалар Пашинянның «Азаматтық келісім» партиясының басқалардан көш ілгері екенін байқатып беріп тұрды.
Gallup International Association армян өкілдігі жүргізген сауалнамаға сәйкес, бұл партия шамамен 32,4 пайыз мөлшерінде дауыс жинауы тиіс. Миллиардер Карапетянның «Күшті Армениясы» 16,4 пайыздық дауыспен екінші орында тұр. Экс-президент Роберт Кочерянның «Армения» блогы 15,2 пайызбен үшінші белеске жайғасады. Бұдан әрі кәсіпкер Гагик Царукянның «Гүлденген Армениясы» – 8,8, бұрынғы омбудсмен Арман Татоянның «Бірлік қанаты» партиясы 6,2 пайызбен келеді. Алайда төрт негізгі оппозициялық күш осылай 46,6 пайыз дауыс жинай алады, бұл енді билік партиясынан едәуір көп.
Ресей Пашинянның ЕО-ға жақындау бағытына наразылығын білдіреді. Ресей президенті Владимир Путин Армениядағы қазіргі ахуал Украинаға қарсы соғыс басталатын кездегі жағдайға ұқсайды деп мәлімдеді. Ол Ереваннан Арменияның Еуропа одағына кіруі туралы референдум өткізуді және оның елі кіммен экономикалық одақ құратыны туралы шешім қабылдауын талап етті. Қысым шарасы ретінде Ресей армян алкоголін, азық-түлік пен гүлдерді импорттауға тыйым салды.
Мұның есесіне, Пашинян АҚШ әкімшілігінің қолдауына ие болды. Мемлекеттік хатшы Марко Рубио Ереванға екіжақты ынтымақтастық туралы келісімге қол қою үшін арнайы келген еді.
