USD
ЕРЕВАН. 15 маусым. Армения Орталық сайлау комиссиясы (ОСК) оппозицияның талабы бойынша қайта санақ жүргізіп, парламент сайлауының ақырғы қорытындысын шығарды. Бұл туралы DW ақпарына сүйенген rast.kz хабарлайды.
Оған сәйкес, Никол Пашинянның «Азаматтық келісім» партиясының ешкімді қатарға қоспай-ақ, Хайастанның жаңа үкіметін өз бетінше құра алатыны белгілі болды. Ал төртінші үміткер – «Гүлденген Армения» парламентке өте алған жоқ.
Армениядағы парламент сайлауының соңғы нәтижелеріне сәйкес, Ұлттық жиналысқа «Азаматтық келісімнен» бөлек, екі ресейшіл партиялар – ресейлік олигарх Самвел Карапетянның «Күшті Армения» және жемқорлығымен аты шыққан бұрынғы президент Роберт Кочарянның «Армения» блоктары кірді. Бұлардың екеуі да қатарларына басқа партияларды қосып алып, сайлауға блок мәртебесінде қатысты.
Дауыс санағының ақырғы қорытындысын 14 маусым, жексенбі күні Ереванда өткен баспасөз мәслихатында Орталық сайлау комиссиясының төрағасы Ваагн Овакимян жария етті.
ОСК мәліметтері бойынша, сайлаушылардың 49,75%-ы «Азаматтық келісімге» дауыс берген, осы арқылы партия 64 мандатқа қол жеткізген. Өз кезегінде «Күшті Армения 23,27% дауыс алып, 29 мандатқа ие болды, «Армения» 9,92%-дық дауыспен 12 мандаттың иесі атанды.
Осылайша, еуроинтеграцияға бағытталған Пашинян партиясы жаңа үкіметті жалғыз өзі құруға мүмкіндік алады.
Орталық сайлау комиссиясы «Кәсіпкер Гагик Царукянның «Гүлденген Армения» партиясы, сайлауға қатысқан қалған 14 саяси күш сияқты, 3,9893% дауыспен парламентке өту үшін керекті 4 пайыздық кедергіні бұза алған жоқ» деп мәлімдеді.
Соңғы қорытынды нәтиже жарияланғаннан кейін Никол Пашинян алдағы мақсат елді жемқорлардан тазарту болатынын айтты.
«Оппозициялық партияларға келсек, сайлаушыларды сатып алмаса, олардың бірде-бірі парламенттің табалдырығынан аттай алмаған болар еді», – деді ол.
Ұлттық жиналыстың вице-спикері Рубен Рубинян одан да қатты кетіп, елдегі сайлау қорытындысына күмән келтіріп, қайта санақ жүргіздірген оппозициялық күщтердің бірде-біріне депутаттық мандат берілмеуі тиіс екенін баяндады. Ол оппозициялық партиялар өз еріктерімен тарап кетулері керек деп есептейді.
«Біз сайлаушыларға пара таратумен айналысып кеткендігінен, әу басынан бұл күштерді тіркелуден шығарып тастау керек деп есептегенбіз», – деді ол.
