USD
ӘБУ-ДАБИ. 11 шілде. Армения премьер-министрі Пашинян мен Әзербайжан президенті Әлиев Біріккен Араб Әмірлігінде келіссөз жүргізді. Бұл туралы DW ақпарына сүйенген rast.kz хабарлайды.
Келіссөз БАӘ байтағы – Әбу-Даби шаһарында өтті. Бірқатар сарапшылар мұны Ресейдің Оңтүстік Кавказдағы ықпалының әлсірегенінің айғағы деп санайды.
Шілденің 10-ы, бейсенбі күні Әбу-Дабиде Армения премьер-министрі Никол Пашинян мен Әзербайжан президенті Ильхам Әлиев келіссөз жүргізді. Кездесу делегациялар арасындағы байланыс форматында басталып, одан кейін бетпе-бет жүздесу сипатында жалғасқан төрт сағаттан астам уақытқа созылды.
Кездесуден кейін Армения мен Әзербайжан сыртқы істер министрліктерінің сайттарында келіссөздер туралы бірдей пресс-релиздер пайда болды. «Екіжақты келіссөздер қалыпқа келтіру үдерісіне қатысты барлық мәселелерді талқылаудың ең тиімді форматы екені расталды және осы негізде нәтижеге бағытталған осындай диалогты жалғастыру туралы шешім қабылданды», – делінген хабарламада.
Пашинян мен Әлиев «шекараны делимитациялау үдерісіндегі ілгерілеушілікті атап өтті» және «тиісті мемлекеттік комиссияларға осы бағыттағы практикалық жұмысты жалғастыруды тапсырды». «Сонымен қатар тараптар екіжақты келіссөздер мен екі ел арасындағы сенім шараларын жалғастыруға келісті», – делінген баспасөз хабарламасында.
«Бұл – Әлиев пен Пашинянның алғашқы тікелей келіссөздері. Бұрын олар не медиаторлардың қатысуымен, не халықаралық саммиттер аясында өткен», деп хабарлайды BBC медиа компаниясы.
Армения мен Әзербайжан арасында Қарабақ жері үшін 30 жылдан астам қақтығыс болып келеді. Соңғы жылдары Әзербайжан бұл аумақты әскери күшпен өз бақылауына алды, Қарабақ армяндары Арменияға қашып кетті, ал Ереван аймаққа қатысты талаптарын тастады. 2024 жылдың маусымында бұл өңірден соңғы ресейлік бітімгершілік күштер кетті.
2025 жылдың наурыз айында Бакы мен Ереван бейбіт келісімге келді. Алайда бірнеше ай бойы құжаттарға қол қойылмады. «Әбу-Дабиде де бұған қол жеткен жоқ», деп жазды Армения Сыртқы істер министрлігінің баспасөз хатшысы Ани Бадалян Facebook-те. «Егер бітімгершілік келісімі болса, жұрт бұл туралы хабардар болар еді», – деп жазды ол. «Армения Әбу-Дабидегі кездесуді сәтті өтті деп санайды. Біз оның бейбітшілік үдерісін одан әрі жүзеге асыру үшін маңызды негіз бола алатынын растаймыз», – дегенді қосты Бадалян.
