Департамент квазимемлекеттік секторлар қызметіне көңіл бөледі
НҰР-СҰЛТАН. 12 наурыз. Бүгін «Antikor Ortalyǵy»-да Нұр-Сұлтан қалалық сыбайлас жемқорлыққа қарсы іс-қимыл департаментінің бастамасымен елорданың квазимемлекеттік секторларындағы сыбайлас жемқорлыққа қарсы комплаенсқа қатысты жұмыс кездесуі өтті. Бұл туралы департамент баспасөз қызметінің дерегіне сүйенген rast.kz хабарлады.
Іс-шараға Нұр-Сұлтан қалалық сыбайлас жемқорлыққа қарсы іс-қимыл департаменті басшысының бірінші орынбасары Бақытжан Ниязов, ҚР Президенті жанындағы Мемлекеттік басқару академиясының сыбайлас жемқорлыққа қарсы іс-қимыл мәселелерін зерделеу орталығының сарапшы-талдаушысы Айбек Қабылдин, сондай-ақ «Astana» ӘКК АҚ, «Астана Теплотранзит» АҚ, «Астана-арнайы қызмет көрсету бюросы» ЖШС, «Астана орманы» ЖШС, «SPK Astana Development» ЖШС, «Астанагорархитектура» ЖШС, «Астана-Технополис» АЭА, «Астана Тазалық» ЖШС квазимемлекеттік секторының комплаенс-офицерлері қатысты.
Аталған мекемелерде комплаенс қызметтері ашылды.
Елорда аумағында 30-дан астам квазимемлекеттік сектор бар.
Бүгінгі күні департаментпен квазимемлекеттік және жеке секторларда сыбайлас жемқорлыққа қарсы комплаенсті ілгерілету бойынша 4 кездесу өткізілді, оған 40-тан астам компания қатысты.
Өз сөзінде Бақытжан Ниязов бизнесті парасатты жүргізудің маңыздылығын атап өтті.
Квазимемлекеттік секторларда сыбайлас жемқорлыққа қарсы комплаенсті енгізу жөніндегі міндет заңнамалық деңгейде енгізілген және корпоративтік адалдық стандарттарының сақталуын бақылауды көздейді.
Ол аталған жұмыстар комплаенс-қызметтерді құру, оларды білікті кадрлармен жасақтау барлық квазимемлекеттік секторларда жүргізіліп жатқанын атап өтті.
Айбек Қабылдин ISO 37001 «парақорлықпен күрес менеджменті жүйесі» стандарты және оның негізінде сыбайлас жемқорлыққа қарсы комплаенс қалай құруға болатыны туралы толығырақ айтып берді.
«Квазимемлекеттік секторда сыбайлас жемқорлыққа қарсы комплаенс институты жүргізілген сәттен бастап академия парасатты бизнес қағидаттарын қалыптастыру бойынша кешенді жұмыс жүргізуде. Ол үшін комплаенс-офицерлерді оқыту модульдері және сыбайлас жемқорлыққа қарсы комплаенс бойынша ұйымдарды сертификаттау процесі іске қосылды», – деп хабарлады спикер.
Айбек Қабылдин қатысушыларды ISO 37001 стандарты негізінде сыбайлас жемқорлыққа қарсы комплаенс жүйесін құрудың негізгі элементтерімен және кезеңдерімен таныстырды.
Сондай-ақ қатысушыларға өздерін қызықтырған сұрақтар қоюға мүмкіндік беретін ашық диалог өтті.
Бұл бағыттағы жұмыс жалғасатын болады.
