Сергей Марков: армян әскерлері бұдан әрі соғыса алмады
МӘСКЕУ. 10 қараша. Ресей саяси зерттеулер институтының директоры Сергей Марков армян армиясының бұдан әрі соғыса беруге шамасы жоқ болғанын айтты. Бұл туралы «Вестник Кавказа» хабарлады.
«Армян армиясы премьер-министр Никол Пашиняннан капитуляция жасауға рұқсат сұрады, өйткені, ол енді әзербайжан әскерлеріне қарсы соғыса алмайтын еді», – деді ол «Вестник Кавказа» порталының тілшісіне берген сұхбатында.
«Армян армиясының ауыр жағдайы, соғыстағы жеңіліс Пашинянның осындай шешім қабылдауына себеп болды. Шуша алынғаннан кейін армян әскерлері шын мәнінде қоршауда қалып қойды. Сондықтан Пашинян жеңілгенін мойындады. Ол мұны армияның талабы бойынша жасағанын мәлімдеді, өйткені, әскерилер оған бұдан әрі соғыса алмайтындарын, ұрыс қимылдарын тоқтату керектігін айтты», – деді ол.
Соғыстың аяғы бұлайша болып бітуі жанжалды бейбіт жолмен реттеудің жақсы перспективасын ашады. «Өңірде тыныштық орнайды. Әзербайжан өзінің Таулы Қарабаққа егелігін қайта қалпына келтіреді. Онда тұрып жатқан армяндар автономия болып қала береді. Оның мәдени немесе саяси автономия боларын кейін жүргізілетін келіссөздер шешеді. Бұдан басқа, Ресей бітімгерлері кепілдікті мойнына алатын бейбіт тұрғындарды қорғау жөніндегі шаралары ойластырылады. Сол сияқты Әзербайжан мен Нахичевань арасындағы коммуникацияны қайта қалпына келтірудің маңызы зор», – деді Сергей Марков.
Сарапшылардың бағасы бойынша, Ресейдің тікелей қатысуымен жасалатын келісім Ресейдің Оңтүстік Кавказға ықпалын күрт арттырып жібереді. «Ресей қауіпсіздіктің кепілі рөлін ойнайтын болады», – деді саясаттанушы.
Еске сала кетейік, 9 қараша күні РФ президенті Владимир Путин, Әзербайжан президенті Ильхам Әлиев және Армения премьер-министрі Никол Пашинян Қарабақтағы соғыс қимылдарын толық тоқтату жөніндегі бірлескен мәлімдемеге қол қойды. Қол жеткен келісімге сәйкес, әзербайжан және армян тараптары әзірге өздерінің қазіргі тараптарында қалады, ал өлкеге ресейлік және түркиялық бітімгер әскерлер орналасатын болады. Сол сияқты Армения Әзербайжанға 15 қарашаға дейін Келбаджар ауданын, 20 қарашаға дейін Агдам ауданын, ал 1 желтоқсанға дейін Лачин ауданын қайтарады.
