USD
ҚЫЗЫЛОРДА. 23 маусым. Бұрнағы күні ҰБТ-ның бірінші күнінде Қызылорда облысының Шиелі ауданынан шыққан түлек 130 балл жинады. Бұл туралы «Сыр бойы» газеті хабарлады.
Ұлттық бірыңғай тестілеуде алғашқы күні жарқ етіп көрініп, топ басына шыққан талапкер аудандағы М. Шоқай атындағы №41 мектептің оқушысы Диас Қиянбекұлы екен. Аталмыш мектеп М. Шоқай атындағы ауылда орналасқан.
«Жалпы, осы күні 27 талапкер 100-ден астам ұпай жинай алды. Білім бәсекесі Шиелі ауданынан басталды. Оған 174 оқушы қатысты. Оның барысында 1 оқушы өз еркімен сынақтан бас тартты, 2 оқушы тыйым салынған заттар алып келуіне байланысты тестілеуден шығарып тасталды. Бұл жөніндегі шешімді Білім және ғылым министрлігі қабылдады», – деді облыстық білім басқармасының баспасөз хатшысы Абай Тағыберген.
Білім сынағы карантин жағдайында ұйымдастырылғандықтан, түлектер тестілеу пунктіне бетперде тағып кіріп, бір-бірлерімен ара қашықтық ұстады.
