USD
ҚЫЗЫЛОРДА. 21 қазан. Бүгін Қызылордада көрнекті театр сыншысы, профессор Бағыбек Құндақбаевтың 100 жылдығына орай Қазақстан драма театрларының XXXI республикалық фестивалінің шымылдығы түрілді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Өнер мерекесі дәстүрлі қызыл кілем шеруімен басталды. Салтанатты шараға қазылар алқасының мүшелері, құрметті қонақтар, театр қайраткерлері мен республиканың әр өңірінен келген шығармашылық ұжымдар қатысты.
Фестивальдің ашылу салтанатында Қызылорда облысы әкімінің орынбасары, Президенттің «Байқоңыр» кешеніндегі арнаулы өкілі Қайрат Нұртай құттықтау сөз сөйлеп, қазақ театртану ғылымының қалыптасуы мен дамуына сүбелі үлес қосқан профессор Бағыбек Құндақбаевтың еңбегіне тоқталды.
Сондай-ақ, Гүлжамила және Күлипа Бағыбекқызына қазақы дәстүрге сай құрмет көрсетілді.
Мерекелік кеш жергілікті өнерпаздар мен театр артистерінің концерттік бағдарламасына ұласты.
Қонақтар арнайы ұйымдастырылған көрмені тамашалады. Экспозицияға Бағыбек Құндақбаевтың өмірі мен ғылыми-шығармашылық жолын танытатын фотосуреттері, еңбектері және қазақ театртану ғылымына қосқан үлесін айғақтайтын құнды материалдар қойылды.
Алты күнге созылатын өнер додасына еліміздің әр өңірінен іріктелген 10 театр ұжымы қатысады. Үздік қойылымдарын көрермен назарына ұсынып, шығармашылық ізденістерін танытады.
Сыр өңірінде басталған республикалық театр фестивалі – ұлттық сахна өнерінің дамуына серпін беріп, шығармашылық байланыстарды нығайтатын маңызды мәдени алаң. Қазақ театртану ғылымының көрнекті өкілі Бағыбек Құндақбаевтың рухани мұрасын ұлықтауға арналған бұл өнер мерекесі ұлттық театрдың бай дәстүрі мен бүгінгі жетістіктерін сабақтастырып, көрерменге тағылымды қойылымдар мен жарқын әсер сыйламақ.
