USD
АҚТӨБЕ. 12 қыркүйек. Ақтөбеде УЕФА талаптарына толық жауап беретін заманум жаңа футбол стадионының іргетасы қаланды. Бұл туралы Ақтөбе облысы әкімі баспасөз қызметінің дерегіне сүйенген rast.kz хабарлайды.
Жаңа стадион 35 мың көрерменге арналған. Ол облыс орталығының батыс бөлігінде, 25 гектар жерге орналасады. Құрылыс жұмыстары үшін әзірге 6,5 миллиард теңге бөлінген.
Кешен өңірдегі ең ірі спорт инфрақұрылымы нысандарының біріне айналады, онда жас спортшылар даярланатын болады. Стадион УЕФА-ның 4-деңгейі талаптарына сәйкес жобаланған, онда жалпы ауданы 80 мың шаршы метрден асатын бес қабатты спорт ғимаратының құрылысы бой көтереді.
«Нысанда футбол алаңы мен көрермендер трибуналарынан басқа командалар мен бұқаралық ақпарат құралдарының өкілдеріне арналған инфрақұрылым болмақ», – делінген мәтбұғат парақшасында.
Құрылыс үш кезең бойынша жүзеге асырылады. Әкімдік алып стадион 2028 жылы аяқталады деп жоспарлап отыр. Үкімет бөлген 6,5 миллиард теңге биыл басталған бірінші кезеңге бағытталады.
Айта кетейік, Ақтөбе қаласында 1975 жылы салынған стадион бар. Оның сыйымдылығы 13 мың адамды қамтиды. Бірақ жыл санап футбол жанкүйерлері саны артып келеді. Сол себепті жаңа стадионның құрылысы ауадай қажет.
Облыс билігі жаңа стадион жанкүйерлерді көбірек қабылдап, халықаралық деңгейдегі матчтарды өткізеді деп есептейді, сонымен бірге мұнда түрлі спорттық мәдени іс-шараларды өткізуді жоспарлап отыр.
Тағы бір айтатын жайт, биылғы 19 тамызда Маңғыстау облысының орталығы – Ақтау қаласында да UEFA-ның 4-санатына жататын және Қазақстан футбол федерациясының талаптарына сай келетін 10 мың орындық жаңа көп функционалды стадионның құрылысы басталды.
