USD
ТЕГЕРАН. 17 наурыз. Иран ФИФА-дан әлем чемпионатының өз елі құрамамының қатысуымен өтетін үш ойынын АҚШ-тан Мексикаға ауыстыруды сұрады. Бұл туралы DW ақпарына сүйенген rast.kz хабарлайды.
«Иран футбол федерациясы ФИФА-мен әлем чемпионатының үш топтық кезеңін АҚШ-тан Мексикаға ауыстыру туралы келіссөздер жүргізуде», деп баяндады парсы елінің елшілігі.
«Иран алдағы әлем чемпионатының үш топтық кезеңін АҚШ-тан Мексикаға ауыстыру туралы Халықаралық футбол федерациясымен (ФИФА) келіссөздер жүргізуде. Бұл өтініш қауіпсіздік мәселелеріне байланысты жасалып отыр», деп атап өтті Мексикадағы Иран елшілігі 16 наурыз, дүйсенбі күні Иран футбол федерациясының президенті Мехди Таджге сілтеме жасай отырып.
АҚШ президенті Дональд Трамптың Иран құрамасының қауіпсіздігіне кепілдік беру мүмкін еместігі туралы мәлімдемелерін ескере отырып, команда «әрине, Америка Құрама Штаттарында ойнамайды» деп атап өтті Тадж. «Біз Иран құрамасының қатысуымен әлем чемпионатының ойындарын Мексикада өткізу туралы ФИФА-мен келіссөздер жүргізудеміз», дегенді қосты ол. Иран құрамасы әлем чемпионатының топтық кезеңінде Лос-Анджелесте Жаңа Зеландия мен Бельгиямен, ал Сиэтлде Египетпен ойнайды деп жоспарланған. Иран құрамасының базасы Аризона штатының Тусон қаласында болады деп жоспарланыпты.
Бірнеше күн бұрын Дональд Трамп Иранның әлем чемпионатына қатыса алатынын, бірақ команданың ойындарын АҚШ-та өткізу «олардың өмірі мен қауіпсіздігі үшін» орынсыз болуы мүмкін екенін мәлімдеген еді. Сонымен қатар, ФИФА президенті Джанни Инфантино Трамп бұрын Иран футболшыларының АҚШ-қа кірулеріне рұқсат бергенін мәлімдеген.
Иран билігі өз кезегінде ақпан айының соңында АҚШ пен Израиль бастаған соғысқа байланысты алдағы әлем чемпионатына бойкот жариялау мүмкіндігін ескертті. AFP агенттігінің хабарлауынша, әлі ресми шешім қабылданған жоқ.
2026 жылғы әлем чемпионаты 11 маусым мен 19 шілде аралығында АҚШ, Канада және Мексикада өтеді.
