USD
УАШИНГТОН. 16 наурыз. АҚШ президенті Дональд Трамп Кремль қожайыны Владимир Путиннің Еуропадан емес, Штаттардан қорқатынын түсіндірді. Бұл туралы Dialog.ua ақпарына сүйенген rast.kz хабарлайды.
Америка лидері Дональд Трамп Иранға қарсы соғыс пен Ормуз бұғазын бұғаттау жайына арналған үлкен баспасөз мәслихатын өткізді. Онда ол барлық мәселелермен бірге Кремльдің қожайыны Владимир Путин жөнінде де бірер ауыз ойын қыстыра кетті. Жиын кадрлары Ақ үйдің ресми Facebook-аккаунтында жарияланды.
Президент өзінің сөзінде НАТО-ның күшін қамтамасыз етіп отырған Еуропа емес, АҚШ екенін айтты.
«НАТО деген – бізбіз (АҚШ – ред.). Путиннен сұраңдар. Путин бізден қорқады. Ол қорықпайды, ол Еуропадан мүлде қорықпайды. Ол Америка Құрама Штаттарынан және мен өзімнің бірінші мерзімімде құрып қойған армиядан қорқады», – деді Дональд Трамп.
Ол сонымен қатар одақтастарын Ормуз бұғасының бұғатын бұзуға көмектесуге шақырды. Трамп дәл қазіргі мезетте аталмыш логистикалық жолдың Жапониядан да, Қытайдан да, Кореядан да маңызды болып тұрғанын мәлімдеді.
Трамп Америка әскерлерінің Иранға қарсы соғыс барысында 7 мыңнан астам әскери және коммерциялық нысандарды жойып жібергенін атап өтті. Соның ішінде бұғазға мина қойып жүрген 15 кеме қиратылған.
АҚШ лидері сондай-ақ жақында Иранның шабуылдары әлсірейтінін баяндады, себебі, Тегеранның ракеталары саны күн санап азайып келеді.
