Әзербайжан резервтегі жауынгерлерді дайындық сапына қойды
БАКЫ. 6 наурыз. Иран тарапынан екі рет дронмен шабуыл жасау және зымыранмен атқылау орын алғаннан кейін Әзербайжан резервтегі жауынгерлерді жинап, шекара позицияларына орналастырды. Бұл туралы The Moscow News ақпарына сүйенген rast.kz хабарлайды.
Әзербайжан билігі №1 жұмылдыру жариялап, елдің қарулы күштерін толық жауынгерлік дайындыққа қойды. Резервтегі сарбаздар бір уақытта шақырылды, ал әскери бөлімшелер жауынгерлік позицияларға немесе алдын ала белгіленген аймақтарға көшуде. Қорғаныс министрлігі мұның президент Ильхам Әлиевтің шешімімен жүзеге асырылғанын баяндады.
Бейсенбі, 5 наурыз күні Ираннан ұшырылған екі дрон Нахчыванға шабуыл жасады. Біреуі шекарадан шамамен 10 шақырым жердегі халықаралық әуежай терминалының ғимаратына соққы берді, ал екіншісі Шакарабат ауылындағы мектептің маңына құлады. Екі адам жарақат алды, әуежай ғимараты зақымдалды.
Әзербайжан Сыртқы істер министрлігі шабуылды халықаралық құқықтың өрескел бұзылуы деп атады. Иран елшісі наразылық нотасын тапсыру үшін шақырылды, Бакы сонымен қатар Тегераннан тергеу жүргізуді және мұндай оқиғалардың қайталанбайтынына кепілдік беруді талап етті. Әзербайжан Қорғаныс министрлігі азаматтық инфрақұрылымға жасалған шабуылдар «жауапсыз қалмайтынын» мәлімдеді және Әзербайжанның егемендігін, халқын және маңызды инфрақұрылымын қорғау үшін шаралар қабылдауға уәде берді.
Бұған дейін Әлиев АҚШ-Израиль шабуылдарында жоғарғы көсем аятолла Әли Хаменеидің қазасына байланысты көңіл айту үшін Бакыдегі Иран елшілігіне жеке өзі барған болатын.
Financial Times газетінің хабарлауынша, Таяу Шығыстағы қазіргі дағдарысқа дейін де Иран аймақта хаос тудыру және Батысқа қысым жасау үшін көршілес елдердегі энергетикалық нысандарға шабуыл жасаудың төтенше жағдай жоспарын жасаған екен.
