USD
АРАЛ. 21 қараша. Қызылорда облысының Арал ауданында «Қыс-2025» командалық-штабтық оқу-жаттығуының практикалық кезеңі өткізілді. Бұл туралы облыстық төтенше жағдай департаментінің дерегіне сүйенген rast.kz хабарлайды.
«Қызылорда облысының азаматтық қорғау қызметтерінің дайындығын пысықтау, қыс мезгіліндегі төтенше жағдайлардың алдын алу және оларды жою бағытында үйлестіруді күшейту үшін 2025 жылдың 20-21 қарашасында өңірде «Қыс-2025» командалық-штабтық оқу-жаттығуы өткізілді», – делінген хабарламада.
«Қыс-2025» оқу-жаттығуы қыс мезгіліндегі қауіп-қатерлердің алдын алуға, халықтың қауіпсіздігін қамтамасыз етуге бағытталған. Мақсаты – «Қысқы кезеңде төтенше жағдайлардың алдын алу және жою жөніндегі іс-қимылдарға Азаматтық қорғаудың мемлектетік жүйесінің басқару органдары мен күштерін дайындау». Аталмыш оқу-жаттығуға азаматтық қорғау құрылымдары, жергілікті атқарушы органдар, еріктілер жұмылдырылды.
20 қарашада азаматтық қорғау мемлекеттік жүйесінің техникаларының саптық қарауы мен жиыны да орын алды.
Оқу-жаттығуды өткізу орнында жедел штаб құрылып, қыс мезгіліндегі төтенше жағдайлардың алдын алу және оларды жою кезінде азаматтық қорғаудың бағынысты күштері мен құралдары іс-қимылдарының үйлесімдігі мен өзара іс-қимылды жетілдіруі нақтыланды. Оқу-жаттығудың практикалық кезеңіне Арал ауданының әкімі Аманжол Оңғарбаев қатысты. Қызылорда облысы ТЖД бастығының орынбасары, полковник Бекболат Әбдіқадыров жалпы оқу-жаттығудың өткізілу барысына жетекшілік жасады.
21 қарашада сағат 9:00-де №1 практикалық оқу-жаттығу – КAZ-06 «Қарабұтақ – Қызылорда – Шымкент» автожолының 1357 шақырымында өтті. Ол қыс мезгіліндегі жол-көлік оқиғасы кезіндегі іс-қимылға арналды.
Оқу-жаттығудың шартына орай, жолаушылар автобусы жеңіл автокөлікпен «соқтығысты», салдарынан жол-көлік оқиғасы орын алды, жолаушылар автобусында бірнеше азамат «жарақаттанып», жеңіл автокөліктің жүргізушісі көліктің ішінен шыға алмай, қыстырылып қалды. Соқтығысқан автокөліктерге авариялық-құтқару жұмысын жүргізу, адамдарды қауіпсіз орынға эвакуациялау, жылы орынмен және ыстық тамақпен қамтамасыз ету, медициналық көмек көрсету, төтенше жағдай зардаптарын жою бағытында тиісті іс-қимылдар жүргізілді. Жаттығу 32 адам мен 12 техника қамтыды.
Сағат 11:00-де Арал аумағында теміржол желісінде №2-ші практикалық оқу-жаттығуы ұйымдастырылды. Ол жолаушылар поезының вагонында өрт оқиғасы орын алып, поезд қозғалысы бірнеше сағат тоқтауы жайын қарастырды. Вагонда туындаған «өрт» сөндірілді. Адамдарды қауіпсіз орынға эвакуациялау, жылы орынмен және ыстық тамақпен қамтамасыз ету, медициналық көмек көрсету, ТЖ зардаптарын жою жұмысы жүргізілді. Оған авариялық құтқару құрылымдарынан 20 техника, 53 адам жұмылдырылды.
Сағат 13:00-де №3 оқу-жаттығу жүзеге асты. Оқу-жаттығудың сценарийіне сәйкес, Арал ауданында «қарлы боран» болды. Мал-жанға қолайсыз климат орын алып, салдарынан жол таппай адасқан, мал тасымалымен айналысатын 2 азамат жоғалды. Оларды іздестіру-құтқару жұмысы ұйымдастырылып, далалы жерден адасқан азаматтарды тауып, оларға медициналық көмек көрсетілді. Аталмыш практикалық оқу-жаттығуға – іздестіру-құтқару жұмыстарына 14 техникасыме 64 қызметкер, сонымен бірге 1 кинологиялық есеп тобы белсене қатысты.
Жалпы, 2025 жылғы 20-21 қарашасында өңірде ұйымдастырылған «Қыс-2025» облыстық командалық-штабтық оқу-жаттығуға 1154 адам, 339 техника, 1 кинологиялық топ қатыстырылды.
