Қызылорда облысында вирус жұқтырғандар 26 адам болды
ҚЫЗЫЛОРДА. 2 сәуір. Қызылорда облысында коронавирус инфекциясын жұқтырып алғандар саны бүгін 26 адамға жетті. Бұл туралы kyzyzlorda-news.kz хабарлады.
Қызылорда облысының әкімі Гүлшара Әбдіқалықова «Хабар 24» телеарнасының эфирі арқылы аймақтағы індетке байланысты ахуал мен оған қарсы күрес турасында баяндап берді.
«Қазіргі таңда облыс бойынша инфекция жұқтырғандар саны 26-ға жетті. Оның ішінде Қызылорда қаласында – 6, Жаңақорған ауданында – 16, Қармақшы ауданында – 2, Шиелі ауданында 2 оқиға тіркелген. Осы кезде Қызылорда қаласы мен Жаңақорған ауданы карантинге жабылды», – деді Гүлшара Наушақызы.
Оның айтуынша, аймақта індеттің алдын алып, ауыздықтау бағытында барлық шаралар қолданылып жатыр.
«Ең алдымен адамдар мен барлық көліктер түрлерінің қозғалысы шектелді. Барлық науқастар жұқпалы аурулар ауруханасына жатқызылды. Вирус тасымалдаушылармен байланыста болған адамдар анықталып, бақылауға алынып жатыр», – деді облыс әкімі.
Аймақ басшысы бұдан әрі Қызылорда қаласына кіретін жолдарға 4 блок-бекет қойылғанын айтты. Бірінші бағыт Шиелі – Қызылорда автожолында, екінші бағыт Қызылорда – Жезқазған автожолы бойында «Абай» ауылы тұсында, үшінші бағыт Жалағаш – Қызылорда жолындағы Қараөзек станциясы маңында, төртінші бағыт Тұңғыш Президент саябағы жанында тұр. Әр бекетте 14 әскери қызметкер кезекшілікпен жұмыс жасайды.
Облыс әкімі сөзінің соңында аймақтағы дәрігерлерге, полицейлер мен әскери қызметкерлерге алғысын білдірді.
