МӘМС төлемей жүргендердің жартысынан көбінің табыстары жақсы

АСТАНА. 7 қазан. Денсаулық сақтау министрі Ақмарал Әлназарова міндетті әлеуметтік медициналық сақтандыру (МӘМС) төлемін төлемей жүргендердің көбі жақсы табыс табушылар екенін айтты. Бұл туралы Azattyq Rýhy ақпарына сүйенген rast.kz хабарлайды.

Қазақстанда міндетті әлеуметтік медициналық сақтандыру жүйесінде сақтандырылмаған 2,4 млн адамның 1,5 миллионында актив пен табыс бар. Мұның дерегін бүгін Үкімет отырысында Денсаулық сақтау министрі Ақмарал Әлназарова мәлім етті.

Ведомство басшысының айтуынша, шын мәнінде ең алдымен осал топтағы азаматтар ғана өздерін өздері сақтандырады. Ал бақуатты өмір сүретіндер бұған аса көп бас қатырып жатпайды. Сондықтан олардың жартысынан көбі бұл шараны қажетті деп таппайды.

«Бүгінде мемлекет халықтың 15 санаты үшін сақтандыру жарналарын төлейді, оларға балалар, жүкті әйелдер, зейнеткерлер, студенттер, мүгедектігі бар адамдар, жұмыссыздар және басқа да санаттағы азаматтар кіреді. Ал сақтандырылмаған 2,4 миллион адамның шамамен 1,5 миллионы Еңбек министрлігінің «А» және «В» санатына жатады. Былайша айтқанда, сақтандырылмаған азаматтардың 60 пайыздан астамы ұзақ мерзімді активтері және жеткілікті табысы бар халық», – деп баяндады министр.