USD
ВАРШАВА. 4 маусым. Польша Республикасының президенті сайлауында жеңіске жеткен Карол Тадеуш Навроцки жоғары мемлекеттік қызметке сайланғасын Украинаға қатысты алғашқы мәлімдемесін жасады. Бұл туралы DW ақпарына сүйенген rast.kz хабарлайды.
Ол екі ел арасындағы серіктестікке қатысты жылы лебізін білдірді және Кремльдің Украинаға қарсы агрессиясын айыптады, бірақ сонымен бірге жұрт еріксіз ойланып қалатындай сөз де тастады.
Айтуына қарағанда, Навроцки Польшаның Украинамен тығыз серіктестігінің жалғасатынына үміт білдіреді. Бұған қоса, ол өз елінің Ресей агрессиясына қарсы тұруда Украинаның адал одақтасы бола беретінін атап өтті.
«Бірде-бір ел бұл қатердің қвупін біз сияқты терең сезіне алмайды», – деп жазды ол.
Сонымен қатар, Навроцкидің жазбасында екі ел арасында «тарихи мәселелер» бар екені жайлы да айтылып қалды. Бұл елеулі елеңдеушілік туғызды.. «Мен елдеріміз арасындағы өзара сыйластық пен түсіністікке негізделген серіктестіктің жалғасуын асыға күтемін. Бұл тек жақсы диалог қана емес, өзекті тарихи мәселелерді шешуді де қажет етеді деп есептеймін», – деді Польша мемлекетінің жаңа басшысы.
Қорытындылай келе, Навроцки екі жақты қарым-қатынастарды нығайту үшін алдағы уақытта бірлескен жұмысты күтетінін айтты.
«Біз өзіміздің ортақ игіліктеріміз үшін бұған дейін шешілмей келген тарихи мәселелерді де шешіп алып, жұмыс істейтінімізге сенемін», – дегенді қосты ол.
Еске сала кетейік, 1 маусым күні өткен президент сайлауының екінші турында консерватор Карол Тадеуш Навроцки – 50,89 пайыз, ал еуропашыл Рафал Тшасковски 49,11 пайыз дауыс жинаған еді.
