USD
АСТАНА. 19 қазан. Алматы облысы полиция департаментінің басшылығында жаппай ауыс-түйіс орын алды. Бұл туралы Zakon.kz ақпарына сүйенген rast.kz хабарлайды.
Бүгін Ішкі істер министрі Ержан Сәденов Алматы облысы полиция департаментінің басшы құрамымен биылғы жылдың тоғыз айындағы жедел қызметтің қорытындысы бойынша жиын өткізді.
Министр жедел кеңесте жеке құрамға облыстық полиция департаментінің жаңа басшысын таныстырды.
«ҚР Президенті Әкімшілігінің келісімі бойынша Ішкі істер министрінің бұйрығымен облыстық полиция департаментінің бастығы болып Мейрам Әбікеев тағайындалды. Полиция полковнигі бұған дейін Солтүстік Қазақстан облысы полиция департаменті бастығының орынбасары болған. Облыстық департамент бастығының бірінші орынбасары болып Бағдат Әшімов тағайындалды», – делінген министрлік баспасөз қызметінің хабарламасында.
Министрдің бұйрығымен сондай-ақ мына қызметкерлер қызметтерінен босатылды:
– Алматы облысы полиция департаменті бастығының бірінші орынбасары Серік Шалқаров;
– Талғар аудандық полиция басқармасының бастығы Нұржан Күнтүнов;
– Полиция департаменті экстремизмге қарсы іс-қимыл басқармасының бастығы Ұлан Байтақов;
– Полиция департаменті криминалдық полиция басқармасының бастығы Руслан Смағұлов;
– Полиция департаменті ұйымдасқан қылмысқа қарсы күрес басқармасының бастығы Дулат Қайыр;
– Полиция департаменті ұйымдасқан қылмысқа қарсы күрес басқармасы бастығының орынбасары Жанат Омаров.
Жедел кеңестің қорытындысы бойынша Ержан Сәденов өңірдегі құқықтық тәртіпті және қоғамдық қауіпсіздікті қамтамасыз ету жөнінде нақты тапсырмалар берді.
Ішкі істер министрі Талғар ауданындағы кәмелетке толмаған жасөспірімнің өліміне қатысты тергеу барысы туралы жедел-тергеу тобын жеке тыңдады. Қорытынды бойынша нақты тапсырмалар берілді.
Суретте: Мейрам Әбікеев
