USD
АЛМАТЫ. 17 қыркүйек. Бокстан Қазақстан құрамасының тұғырына жаңа капитан қонды, сонымен бірге бірнеше спортшының салмақ ауыстыратыны да белгілі болды. Бұл туралы 1bol.kz ақпарына сүйенген rast.kz хабарлайды.
Бокстан Қазақстан командасының жаңадан тағайындалған бас жаттықтырушысы Қайрат Сәтжанов құраманың капитаны алмасқанын айтты.
Бүгін Қазақстан бокс федерациясының ресми парақшасында Айбек Оралбайдың жаңа капитан болып сайланғаны жарияланды. Бұған дейін бұл міндет Асланбек Шымбергеновке жүктеліп келген еді. Сөйтіп, Париж Олимпиялық ойындары бокс турнирінің бірінші жекпе-жегінде-ақ «ұшып» кетіп, онысының себебін «Алланың қалауына» жаба салмақшы болған атлеттің мойнынан топ лидері болу жауапкершілігі алынды.
Еске сала кетейік, Олимпиадада 71 келіге дейінгі салмақта рингке шыққан Асланбек Шымбергенов 28 шілде күні иорданиялық Зейад Ешайшқа 2:3 есебімен есе жіберді. Осылайша өзі бұрын бір рет жеңген боксшысынан ерік-жігері кемдігі мен енжарлығынан ойламаған жерден ұтылып қалған.
«Кеше команда өкілдерімен жиналыс өткіздік. Ұлттық құрама мүшелері түгел қатысты. Жаңа маусым алдындағы жоспарларымызды бөлісіп, жыл соңына дейінгі турнирлерді талқыладық. Жиын соңында команда мүшелері жаңа капитан сайлады. Жасөспірімдер Олимпиадасының жеңімпазы, Азия чемпионы Айбек Оралбай осы міндетті өзіне алды. Соңынан өзі де сөз алып, алдағы жарыстарда ел намысын абыроймен қорғауға уәде берді», – деді Қайрат Сәтжанов бұдан әрі.
Қазақстандық боксшылар алдағы уақытта Азия чемпионатында бақ сынайды. Оған дейін Шымкенттегі халықаралық турнирге қатысу да жоспарланған.
Сонымен бірге, құрамадағы кейбір боксшылардың салмақ дәрежелерін алмастыратыны да айтылды.
«Азия чемпионатына ең мықты деген боксшыларды апарамыз. Құрлық додасы қарсаңында біраз боксшының салмақ дәрежесі ауыспақ. 48 келіде Санжар Тәшкенбай мен Теміртас Жүсіпов, 51 келіде Сәкен Бибосынов пен Дамир Әбдіхалықов арасында өзара мықты атанған боксшыларға басымдық береміз. Махмұд Сабырхан да 54 келіде күш сынап көретінін айтты. Серік Теміржанов 60 келіге, Айбек Оралбай +92 келіге ауысып жатыр. Қамшыбек екеуін бақылаймыз, егер Қоңқабаевтың салмағы аздау боп жатса, 92 келіге түсірерміз.Мұның бәрі алдағы уақыттың еншісінде. Салмақ бойынша осындай жаңалықтар бар» – деді бас жаттықтырушы.
Айта кетейік, Париж Олимпиадасында Махмұд Сабырхан 57 келіде, Айбек Оралбай 92 келіде сынға түскен болатын.
Суретте: Айбек Оралбай
