Париж-2024: Мұхамедсабыр да төрешілер қараулығынан жеңіліс тапты (видео)
ПАРИЖ. 2 тамыз. Түн ортасы ауа рингке шығып, грузин Лаша Гурулимен ширек финалдық жекпе-жегін өткізген 63,5 келіге дейінгі салмақтағы Мұхаммедсабыр Базарбайұлы төрешілер қараулығының зардабын тартты. Бұл туралы Olympic.kz ақпарына сүйенген rast.kz хабарлайды.
Осылайша бокстан Қазақстан командасының тағы бір мүшесі Олимпиаданы жүлдесіз аяқтағалы отыр.
Мұхаммедсабыр жекпе-жектің бірінші раундында Лашаны 5:0 есебімен ұтып, алға шыққан. Алайда алаң жиегіндегі арбитрлар екінші раундта ғана «бойында ептеп жан бітіп», қимыл жасай бастаған Гурулиге тап осындай есеппен жеңісті бере салды. Ал соңғы раундта Базарбайұлының бәсекелесінен едәуір белсенді қимылдап, тиісті соққыларды беріп үлгергеніне қарамастан, көкіректері қара қазылар тағы да ұтысты 3:2 есебімен Лаша Гурулиге ұстата қойды.
Мұның алдында біздің 92 келіге дейінгі салмақтағы Айбек Оралбай да үш раунд бойы қашып жүрген тегі кубалық Әзербайжан құрамасының өкілі Лорен Берто Алфонсо Домингеспен шайқаста ұтылған болып есептелген еді.
Бұдан бір күн бұрын 75 келіге дейінгі салмақтағы Валентина Хальзова мен 57 келіге дейінгі салмақтағы Махмұд Сабырхан да қарсыластарынан ұтыла қоймаған еді. Олар да төрешілер қараулығының құрбандығына ұшырады.
