USD
ПАРИЖ. 1 тамыз. Бүгін өзінің 1/8 финалдық шайқасын тегі кубалық Әзербайжан құрамасының өкілімен өткізген Айбек Оралбай жеңіске жете алмады. Бұл туралы 1bol.kz ақпарына сүйенген rast.kz хабарлайды.
Турнирде 92 келіге дейінгі салмақта сынға түскен Айбек Оралбай бірнеше жылдан бері Әзербайжан елінің намысын қорғап келе жатқан Лорен Берто Алфонсо Домингеспен ширек финалдық шайқас өткізді.
Бірінші раунд біздің боксшының басымдылығымен ерекшеленді. Ол рингте сенімді қимылдап, қарсыласына бірнеше ауыр соққы беріп үлгерді. Нәтижесінде төрешілер раунд 4:1 есебімен Айбектің пайдасына шешілгенін жариялады.
Алайда қалған екінші және үшінші раундтарда қашып жүріп шайқасқан Лорен Бертоны ұстау біздің боксшыға қиындау тиді. Дегенмен әзербайжандық осылай-ақ ұпай жинай беріпті-міс.
Сондай тұжырым жасаған төрешілер қорытынды нәтижеде 3:2 есебін тіркеп, жеңісті Алфонсо Домингеске беріп жіберді.
Айта кету керек, Қазақстан құрамасының ширек финалдағы алғашқы жекпе-жегі болатын. Бұған дейін үш боксшымыз жарыс жолынан шығып қалған. Енді Сәкен Бибосынов (51 кг), Мұхаммедсабыр Базарбайұлы (63,5 кг) және Нұрбек Оралбай (80 кг) Олимпиада жүлдесі үшін таласатын болады.
Бүгін түнде сағат 00:36-да Мұхаммедсабыр Базарбайұлы картвел Лаша Гурулимен жартылай финалға шығу жолында шайқасады.
