Тшанов: Қазақстанда жемқорлық Назарбаевтың басшылығымен басталды
![](https://rast.kz/wp-content/uploads/amalbek-tshanov1.jpg)
ТАРАЗ. 12 шілде. Белгілі мемлекет және қоғам қайраткері Амалбек Тшанов еліміздегі жемқорлық үдерісінің басында Нұрсұлтан Назарбаев тұрғанын атап өтті. Бұл туралы Dalanews.kz ақпарына сілтеме жасаған rast.kz хабарлайды.
Бұрынғы шенеунік мұны Barys media-ға берген сұхбатында байырғы президенттің қарауында қызмет еткен жылдарына шолу жасап өткен кезінде еске түсірді.
«Мен ол кезде үлкен бірлестіктің бас директорымын, сонымен қатар, Жоғары Кеңестің депутатымын, әлі жаспын. Оған дейін саясатқа араласу ойымда болған жоқ. Себебі, мен үшін өндірісте жұмыс істеу бақыт болатын. Кейіннен маған сондай ұсыныс (Назарбаевтың кеңесшісі болу туралы) болды. Әрине, қуана қарсы алдым. Жаңадан президент сайланған, мен Жоғары Кеңестің депутаты есебінде бәріне қатыстым. Оңтүстік Қазақстанның өкілі болып бардым. Бар пейілімізбен Нұрсұлтан Әбішұлының президент болуына аянбай қызмет еттік. Оның бәрін жұртқа түсіндірдік», – деді Амалбек Тшанов агенттік тілшісіне.
Ол өзінің сөзінде Назарбаевтың адамдармен қарым-қатынаста ерекше талантты болғанын атап өтті.
«Білімі жағынан ешнәрсе айта алмаймын. Бірақ оған Алланың берген таланты бар. Қандай топ болса да, сол жерге кіріп кетеді, домбыра да тарта салады, өлең де айта салады. Сол таланты бәрімізге айдай көрінді. Әлемдегі алдыңғы қатарлы ел боламыз деген ой бәрімізде болды. Соның қасында жүргенімізге мақтандық. Кейін маған қалаға әкім болуға ұсыныс жасады. Алдына барып жұмыс сұрамадым, ойламаған жерде қалаға әкім етті. Маған берген сенімді ақтау үшін ұйқысыз жұмыс істедім», – деді саясаткер.
Амалбек Тшанов экс-президенттің пейілі бұзылғанын 2007 жылы білгенін жеткізді.
«Бұл кісінің пиғылы өзгергенін 2007 жылы байқадым. Мен барлық жерге өзімді ұсынып, депутат болдым. Бірақ маған президент тарапынан Тшановты өткізбе деген қарсылық болған жоқ. Маған қарсылық жасаған – марқұм Сұлтан Сарыбайұлы Қалмырзаев, оның орынбасары Тұрысбеков. Екеуі көп кедергі жасады. Солар президентке кіріп, Тшановты өткізуге болмайды деген екен. Бірақ президент «өзі өтетін болса кедергі келтірмеңдер» депті», – деді Амалбек Қозыбақұлы бұдан кейін.
Белгілі саясаткер Қазақстандағы сыбайлас жемқорлықтың қайнар бастауында Нұрсұлтан Назарбаевтың өзі тұрғанын ашып айтады.
«Кейіннен жемқорлық осы кісінің басшылығымен басталды ғой. 2007 жылы бізді таратқаннан кейін партиялық тізім басталды. «Отан» партиясы құрылып, оның атын жамылып алды. Содан кейін бәрін білдім», – деді ол осыған орай.
Амалбек Тшанов келесі кезекте өзінің бұрынғы президент жөніндегі пікірінің кейін біртіндеп өзгере бастағанын сөз етеді.
«Бұрынғы пікірім мен қазіргі пікірім кейінгі тірліктеріне қарай өзгерді. Ол айқайлап айтатын тірлік емес, жұрттың бәрі айтып жатыр ғой. Бір нәрсені ғана түсінбеймін: өз еліңді сонша тонауға бола ма? Миллиардтар, триллиондар… Қазір қарап отырсам, менің миыма кірмейді», – деп жағасын ұстайды экс-шенеунік.
«Қазір қарап отырсам, менің миыма кірмейді. Мысалы, қазір Қайрат Сатыбалдыны соттап жатыр. Солар миллиардтар әкеліп беріп жатыр. Соны қай қолымен ұрлады, қай қолымен жинады? Соның бәріне жол ашылып берілді ғой. Адам есебінде соны түсінбеймін», – деді Амалбек Тшанов бұдан әрі.