Украина Қарулы күштері Севастопольде Ресейдің «Коммуна» кемесін талқандады
КИЕВ. 22 сәуір. Украина әскери күштері РФ Қара теңіз флотының «Коммуна» корабліне оккупацияланған Севастополь қаласының түбінде күйрете соққы берді. Бұл туралы The Moscow News ақпарына сүйенген rast.kz хабарлайды.
«Украина Қарулы күштерінің соққысынан кейін дұшпанның «Коммуна» кемесі өзінің міндеттерін орындай алмайды», – деп жазады агенттік.
Мұның жайын әскери-теңіз күштерінің спикері Дмитро Плетенчук өзінің Facebook-тегі парақшасында жазды. Ол украинның Әскери-теңіз күштеріне жау флотының тағы бір корабліне соққы берудің орайы келгенін атап өтті. Қазіргі уақытта кемеге келтірілген залал көлемі анықталып жатыр. Бірақ оның енді өзінің жауынгерлік міндеттерін орындай алмайтыны анық.
Әскери-теңіз күштерінің өкілі украин әскерлері РФ Қырымнан толық кеткенше оның Қара теңіз аумағындағы кемелерін жойып жіберуді жалғастыра беретінін айтты.
Айта кетуіміз керек, «Коммуна» РФ әскери-теңіз флотындағы ең көне кеме болып саналады. Оның алғаш рет суға түскеніне жүз жылдан асып кетіпті, яғни 1913 жылы жасап шығарылған екен. Кеме сүңгуір қайықтарды құтқару қызметін атқарады. Ол 2022 жылдың сәуірінде бұдан бұрын украин армиясы суға батырып жіберген «Москва» крейсерін іздеу үшін Қара теңізге жіберілген.
Украина Қарулы күштері 21 сәуір күні азанда Севастопольдегі әскер портты атқылау астына алды. Соның барысында «Коммуна» кемесіне соққы беріп, оны істен шығарып тастады.
