USD
ОСЛО. 5 сәуір. Норвегия билігі алыс келешекте елдің Украинаға көмекке әскер жіберіп қалуы мүмкін екенін жоққа шығармайтынын жариялады. Бұл туралы The Moscow News ақпарына сүйенген rast.kz хабарлайды.
Корольдік сыртқы істер министрлігінің басшысы Эспен Барт Эйде (суретте) келешекте Ослоның Украинаға әскер аттандыруы әбден ықтимал екенін жасырмады.
«Біз дәл қазір әскер аттандыруды жоспарластырып отырған жоқпыз. Бірақ көптеген елдерде мұндай жоспар бар деп ойлаймын. Дегенмен, ұзақ мерзімді келешекте біздің бұдан тыс қалуымыз мүмкін емес», – деді Эйде «Европейская правда» тілшісіне берген сұхбатында.
Ол сонымен бірге қазір Батыс елдерінің Украинаға әскер тастауы жөнінде айтыла қалғанда, әңгіменің Ресеймен тікелей қақтығысқа түсетін қарсы соғыс емес, украин солдаттарын үйретіп, жаттықтыратын нұсқаушылар мен кеңесшілер хақында қозғалатынын айтты.
Эйде НАТО елдерінің Украинаны қолдағылары келетінін, алайда соңы дүниежүзілік соғысқа айналып кетпеуі үшін Ресеймен тікелей соғысқа араласып кетуден сақтанатындарын атап өтті.
Бұдан екі күн бұрын Финляндияның сыртқы істер министрі Элина Валтонен келешекте Хельсинкидің Украинаға әскер жіберуі мүмкін екенін баяндаған еді. «Алайда қазір оның уақыты әлі жеткен жоқ», – деді ол. Валтонен мұндай қадамның мүмкін екені жайлы бірінші болып мәселе көтерген Франция президенті Эммануэль Макронды қолдайтынын осылайша білдірді.
