Қызылордада полицияға жалған ақпар берген азамат жазаға ұшырады
ҚЫЗЫЛОРДА. 2 сәуір. Полицияға жалған хабарлама берген қызылордалық азамат қылмыстық жауапкершілікке тартылды. Бұл туралы Halyq Uni ақпарына сүйенген rast.kz хабарлайды.
Қызылорда қаласының тұрғыны полицияға қоңырау шалып, өз үйінің жанында жарылғыш заттың жатқанын жеткізген. Аталған мәнзілде жару-техник мамандары жүргізген тексеріс жұмыстары нәтижесінде жарылғыш зат табылмады.
«Қызылорда облысы ПД экстремизмге қарсы іс-қимыл басқармасының қызметкерлері жүргізген жедел-іздестіру іс-шараларының нәтижесінде жалған хабарлама берген Қызылорда қаласының 38 жастағы тұрғыны анықталып, оған қатысты ҚР ҚК-нің 273-бабы бойынша қылмыстық іс қозғалды», – делінген хабарламада.
Тергеу барысында жалған ақпарды азаматтың өз туыстарына ренжігеннен, мас халде жібергені белгілі болды.
Қызылорда қалалық сотының үкімімен жалған хабарлама берген азаматқа 3 жыл мерзімге бас бостандығын шектеу жазасы тағайындалды.
