Еліміздің жеті облысында төтенше жағдай режимі жарияланды
АСТАНА. 31 наурыз.Төтенше жағдайлар министрлігі су тасқынына байланысты кеше Қазақстанның жеті облысында төтенше жағдай жарияланғанын баяндады. Бұл туралы nege.kz ақпарына сүйенген rast.kz хабарлайды.
Ведомствоның мәліметі бойынша, Ақтөбе, Қостанай, Батыс Қазақстан, Қарағанды, Абай, Ұлытау және Ақмола облыстарының әкімдіктері жергілікті ауқымда төтенше жағдай режимін жариялаған.
«Түркістан, Ақтөбе, Қостанай, Батыс Қазақстан, Ақмола, Ұлытау және Абай облыстарында 8 811 адам, оның ішінде 3 183 бала эвакуацияланды. Ақтөбе, Батыс Қазақстан, Ақмола, Абай облыстарында уақытша орналастыру бекеттеріне 5 467 адам, оның ішінде 1 977 бала орналастырылды. Әуе кемелерімен 666 адам, оның ішінде 242 бала эвакуацияланды», – делінген хабарламада.
Батыс Қазақстан, Қостанай, Шығыс Қазақстан, Ақмола, Ақтөбе және Абай облыстарында 44 елді мекенмен көлік қатынасы үзілді.
Төрт көпір мен 26 жол төсемін су шайған, қазір бұл учаскелер бақылауда.
ТЖМ және әкімдіктердің күшімен 3,5 млн астам м3 еріген қар суы сорылды, 288 мыңнан астам қапшық және 44,7 тонна инертті материал төселді.
«Қауырт желі» телефондарына 459 қоңырау келіп түскен, 13 өңірде республикалық және облыстық жедел штабтар жұмыс істейді.
Авариялық-құтқару жұмыстарына 6 мыңнан астам адам, 2 мыңға жуық бірлік техника, 644 бірлік су айдау құралы және 61 бірлік жүзу құралы, 12 әуе кемесі жұмылдырылды.
