«Ұлы Жібек жолы» турнирінде қазақ боксшылары үш алтын медаль жеңіп алды
БАКЫ. 28 наурыз. Қазақ боксшылары Әзербайжан байтағында бүгін мәреге жеткен «Ұлы Жібек жолы» халықаралық турнирінде алтын медаль санын үшке жеткізді. Бұл туралы Olympic.kz дерегіне сүйенген rast.kz хабарлайды.
Бакы шаршы алаңындағы финалдық жекпе-жекке бес қазақ боксшысы қатысып, олардың үшеуі алтын медальге қол жеткізді.
Бұдан бұрын хабарлағанымыздай, мұның алдында рингке көтерілген 48 келіге дейінгі салмақтағы Теміртас Жүсіпов – әзербайжан Гасан Меликовтен, 54 келіге дейінгі салмақтағы Тимур Қабдешов өзбек Хужаназар Нортоджиевтен ұтылып, турнирдің күміс медалін қанағат тұтуға мәжбүр болған еді.
Қазақстан құрамасына алғашқы алтын медальді әперген бізден үшінші болып жекпе-жекке шыққан 60 келіге дейінгі салмақтағы Талғат Сырымбетов болды. Ол алаң иелерінің өкілі Эзрак Бабировты ұпай санымен тізе бүктірді.
Бір қуаныштысы, бұдан кейін айқастарын өткізген екі саңлағымыз да жанкүйерлерін жерге қаратпай, қарсыластарын жеңіп шықты. Атап айтқанда, 71 келіге дейінгі салмақтағы Дархан Дүйсебай – өзбек Бекзод Хамидовтан, ал 92 келіге дейінгі салмақтағы Сағындық Тоғамбай (суретте) Олимпиада жүлдегері, бірқатар жылдардан бері әзери елінің намысын қорғап жүрген кубалық Альфонсо Домингестен басым түсті.
Сонымен, Қазақстан боксшылары «Ұлы Жібек жолы» халықаралық турнирінде 3 алтын, 2 күміс және 1 қола медальді қоржынға салды. Қола медаль 86 келіге дейінгі салмақта шайқасқан Бекзат Таңатардың еншісіне бұйырды.
Сол сияқты 51 келіге дейінгі салмақтағы Дамир Әбдіқадыр мен аса ауыр салмақтағы Қамшыбек Қоңқабаев өздерінің бірінші ұрыстарында ұтылып, жарыс жолынан шығып қалды. Бұлардың біріншісі ирандық Мехди Парвизи Хорасаниге, екіншісі ресейлік Рамазан Карнукаевқа есе жіберіп алды.
Командалық есепте Өзбекстан терме жамағаты (6-5-5) – бірінші, Қазақстан – екінші (3-2-1), Әзербайжан құрамасы (2-1-0) үшінші орын алды.
Турнирге 11 елден 121 боксшы қатысты. Әзербайжан атлеті Шамиль Аскеров турнирдің үздік боксшысы атанды.
