Странджа турнирінде қазақтың алғашқы 6 боксшысы түгел жеңіс жетті
СОФИЯ. 7 ақпан. Болгарияның байтағы София қаласында өтіп жатқан «Странджа кубогінде» қазақтың алғашқы 6 боксшысының бәрі жеңіс тойын тойлады, әзірге жеңіліс жоқ. Бұл туралы rast.kz хабарлайды.
Биыл 75-ші мәрте жалау көтерген халықаралық турнирге әлемнің 28 елінен 178 былғары қолғап шебері қатысып жатыр.
Ел аузында «кіші әлем чемпионаты» деген ат алған беделді турнирн 4 ақпан күні 1/16 финалдық іріктеу сайыстарынан басталды. Осы күні қазақстандықтар сапынан рингке көтерілген 4 боксшы да қарсыластарынан басым түсті. Біздің спортшылар арасынан таңертеңгі сессияда бірінші болып бағын сынап көрген Руслан Күзеубаев 60 келіге дейінгі салмақтағы грузиялық қарсыласы Артюш Гомцианиді 4:1 етіп тізе бүктірді. Бұдан кейін 67 келіге дейінгі салмақтағы Дулат Бекбауов болгар Благовест Неделчевпен өткен тартысты бәсекеде таразы басын өзіне аудара білді, есеп – 3:2. Кешкі сессияда 54 келіге дейінгі салмақтағы Дәулет Молдашев қырғыз Руслан Эрнест уулын 4:1 есебімен сүріндірді. Соңынан 80 келіге дейінгі салмақтағы Тұрсынбай Құлахмет болгар Николай Дишковты бет қаратпай ұтты – 5:0!
Ақпанның 5-і күні бізден бір боксшы ғана шаршы алаңға шықты. Ол – 57 келіге дейінгі салмақтағы Оразбек Асылқұлов (суретте) украин Владислав Стасты айқын басымдықпен (5:0) жарыс жолынан шығарып тастады. Бір айта кетерлігі, бұл күні 54, 57, 60, 75 келіге дейінгі салмақтардағы жігіттер өздерінің 1/8 финалдағы сайыстарын өткізді. Осылайша Оразбек ширек (1/4) финалға жолдама алды.
Ақпанның 5-інде де біздің жалғыз боксшы – 63,5 келіге дейінгі салмақтағы Ерасыл Таңқай болгар Красимир Джуровты еш қапысыз ұтты – 5:0! Ол да ширек финалға шықты.
Турнирде 10 ақпанда – жартылай финалдық, 11 ақпанда финалдық шайқастар өтеді.
«Странджа Кубогы» жарысына Украина – 21, Өзбекстан – 19, Болгария – 18, Грузия – 14, Үндістан – 13, ал Қырғызстан 11 боксшысын қосты. Бізден 10 былғары қолғап шебері барды.
Қазақстан құрамасының құрамы мынадай:
51 кг. Санжар Тәшкенбай;
54 кг. Дәулет Молдашев;
57 кг. Оразбек Асылқұлов;
60 кг. Руслан Күзеубаев;
63,5 кг. Ерасыл Таңқай;
67 кг. Дулат Бекбауов;
71 кг. Талғат Шәйкен;
75 кг. Нұрқанат Райыс;
80 кг. Тұрсынбай Құлахмет;
86 кг. Абзал Құттыбеков.
Команданы бастап барған – құраманың бас жаттықтырушысы Мырзағали Айтжанов.
