USD
АСТРАХАН. 26 қаңтар. Ресейдің Астрахан қаласының тұрғыны Сергей Т. облыстың ежелден қазақтың жері екенін айтып, қазақтарды оны Путиннен алып қоюға шақырды. Бұл туралы «Украина 365» арнасы ақпарына сүйенген rast.kz хабарлайды.
Астрахандық орыс жігіті мұны роликке жазып, әлеуметтік желіде таратты. Ол өзінің сөзінде Астраханның қашаннан Қазақстан территориясы болып табылатынын мәлімдеді. Бұған қоса, қазақтарды қазіргі алмағайып уақытты пайдаланып, өңірді «Путиннің фашистік билігі» уысынан босатып алуға шақырды.
«Астрахан ежелден қазақтардың жері болып табылады, оны Путиннің фашистік билігінен азат етіңдер», – дейді жас жігіт микрофон алдында.
Осыған байланысты РФ-да оның үстінен қылмыстық іс қозғалып, өзіне іздеу жарияланды. Құқық қорғау органдары бұл әрекетті терроризмге шақыру деп бағалады. Демек, жігітті 7 жылға дейін бас бостандығынан айыру жазасы күтіп тұр. Бұған жігіт соңынан желіден өзі алып тастаған ролик айғақ болып саналады.
Роликтің өзі Грузия жерінде түсірілген сияқты. Алайда Кремльдегілер Сергей қазір «Орыс еріктілер корпусы» («Русский добровольческий корпус») немесе «Ресейдің азаттығы» («Свобода России») жасақтарының құрамында украиндар жағында РФ-ға қарсы соғысып жүрген болуы мүмкін деген болжам білдіреді. Себебі, оның өзі роликте «біздің адамдар» қазір Белгород жерін «Путиннің жетесіздерінен» босата бастады» деген хабардың ұштығын шығарып қояды.
Сергей роликте Қазақстан жұртына көбірек салмақ сала отырып, Путин «біздің жерімізді құртып бітті» дегенге ойысады. Бұдан бөлек, рашистер фюрері өзінің саясатында бір ғана «жетістікке» жетті – қарттарды, балаларды және қарапайым адамдарды «нәжіске белшелерінен батырып қойды» дегенді айтады.
Сергейдің арнасына 3 мың адам жазылған екен.
