Бүгін «Милан» сапында 15 жасар ойыншы «Фиорентинамен» матчқа қатысты
МИЛАН. 26 қараша. Бүгін түнде Миланда жергілікті «Милан» және «Фиорентина» арасындағы матчқа 15 жасар Франческо Камарда тұңғыш рет алаңға шықты. Бұл туралы Sport Mediaset дерегіне сүйенген rast.kz хабарлайды.
Кездесу Италияның А сериясының 13-турында Миланның «Миланы» мен Флоренцияның «Фиорентина» командалары арасында өтті. Ол 1:0 есебімен алаң иелерінің жеңісімен аяқталды. «Сан-Сиро» стадионында өткен ойынның 45+2-минутында миландық Тео Эрнандес өз командасына пенальти алып берді, оны және өзі дәл түсірді.
Алдыңғы шептегі ойыншылардың көбі жарақаттанып қалулары мен дисквалификация алулары себебінен «Миланның» бас жаттықтырушысы Стефано Пилоли шабуылдың орталығына тек Лука Йовичті ғана қоя алды. Ал 15 жасар Франческо Камарда осыған байланысты құрамға шақырылды.
Жасөспірім кездесудің 82-минутында Йовичті алмастырды.
Камарда осы кезге дейін жасөспірімдер деңгейіндегі 89 матчта 485 гол соққан екен! Ол биылғы жазда «Миланның» 19 жасқа дейінгі командасы құрамына шақырылыпты. Содан бері ұжым сапында барлық турнирлердегі 13 матчқа қатысып, 7 гол соғыпты және 2 нәтижелі пас беріпті.
Бұған дейін итальянның А сериясындағы ең жас ойыншы рекорды «Болоньяның» қорғаушысы Уиздома Амейге тиесілі болып келіпті. Ол 2021 жылдың мамыр айында команданың «Дженоамен» ойынына 15 жастан 274 күн асқанда шығыпты. Бірақ алаңда екі минуттай ғана болған, содан кейін А сериясында ойнамаған.
Ал Камарда қазір 15-тен сегіз ай, яғни 240 күн асып отыр. Ол ойыннан кейінгі қосымша уақытты қосқанда, алаңда 15 минут болған. Осы уақыттың ішінде аяғын бірнеше рет қана допқа тигізіп үлгерген, себебі, матч соңына қарай «Милан» бүкіл команда болып қорғанысқа көшіп, жеңісті есепті әупірімдеп сақтап қалған. Тіпті ең соңғы минутта Майк Меньян қонақтар сапындағы Мандрагора тепкен допты қақпадан бірнеше метр жерден әрең қайтара алған.
Суретте: Франческо Камарда
