Мәжіліс Қазақстан Қарулы күштері қатарын күшейтуге бағыт ұстады
АСТАНА. 15 қараша. Қазақстан Парламентінің мәжілісі бүгін армияның резервшілерін жасау жөніндегі заңнама жобасын қарауға кірісті. Бұл туралы шетелдік бұқаралық ақпарат құралдары дерегіне сүйенген rast.kz хабарлайды.
Сырттағы баспасөз мұны Қазақстан соғысқа дайындалып жатыр деген мазмұнда таратып жатыр. Мәселен, украинның «Диалог.ua» сайты хабарды бүгін «Казахстан готовится к войне: Маджлис приступил к созданию армии резервистов» деген бастақырыппен жариялады. Оның жазуынша, Қазақстан парламенті еріктілерден резервшілер армиясын құру туралы заң жобасын талқылауды бастаған. Бұған депутаттар «Қазақстан жеріне Мәскеу қайта-қайта көз тігіп қоймағасын, елдің өз қауіпсіздігін күшейту үшін» барып отыр.
«Парламенттің заң жобасын талқылауы 15 қарашаға жоспарланған», – делінген хабарламада. Ол еріктілер есебінен жасақталатын жеке армия резервін құруды қарастырады. Құжатта резервшілердің әрекет етуші әскери бөлімдерде әскери дайындықтан өтетіндері атап көрсетілген. Ел үшін соғыс қаупі төнген жағдайда бұл жауынгерлер әскери міндеттерді орындау үшін жедел қатарға тартылады.
Жобада резервке әйелдердің де тартыла алатыны атап көрсетілген. Олар тікелей ұрыс қимылдарына қатысы жоқ басқа қызметтерді атқара алады.
Егер заң қабылданып кетсе, Қазақстанда резервшілер армиясы 2025 жылға қарай пайда болып қалады. Бірінші кезеңде оның құрамына 2 мыңға жуық адам шақырылады.
Айта кету керек, 2022 жылдың 24 ақпанында Ресей армиясы Украинаға тұтқиылдан кең көлемде басып кіргеннен кейін Кеңес Одағы тарағалы бері импершілдікпен ауырып келе жатқан бұл агрессияшыл елдің тап осындай соғыс қаупін Қазақстанға да төндіруі әбден мүмкін екені, тіпті батыстағы ұрыс қимылдары тез арада жеңісті аяқталған жағдайда оның бағытты содан кейін шығысқа қарай бұруы ешбір күмән тудырмайтыны айқындалып қалған еді.
РФ президенті Путиннен бастап, Кремльдің Жириновский секілді көптеген жаршылары, сондай-ақ мемлекеттің думаның бір топ депутаттары жер мәселесіне байланысты, арасында «орыстардың қысым көруі» деген сияқты желеуді жалаулатып, Қазақстанға қайта-қайта тиісуге бел шеше кірісіп кеткендері мұндай сценарийдің болғаны анық екенін айқындай түседі.
