USD
ЖАҢАҚОРҒАН, 31 шілде. Қызылорда облысының әкімі Нұрлыбек Нәлібаев жұмыс сапарымен Жаңақорған ауданында болып, бірқатар жаңа әлеуметтік нысандарды аралап көрді. Бұл туралы облыс әкімі баспасөз қызметінің ақпарына сүйенген rast.kz хабарлайды.
«Бүгін облыс әкімі Нұрлыбек Нәлібаев Жанақорған ауданына жұмыс сапарымен барып, әлеуметтік нысандардың құрылыс жұмыстарымен танысты», – делінген хабарламада.
Аймақ басшысы ат басын әуелі Жайылма ауылдық округіне бұрды. Ол осында салынып жатқан 150 орындық клубтың құрылыс алаңына аялдады. Нысанның бас мердігері – «Астана Сервис ЛТД» ЖШС құрылысты 2021 жылы тамыз айында бастаған екен. Енді ол белгіленген межеге сай, алдағы тамыз айында пайдалануға берілуге тиіс.
Облыс әкімі бұдан әрі осы ауылдық округтегі шаруа қожалығының егістік алқабына ат басын тіреді.
Жалпы, биыл Жаңақорған ауданында 38 мың гектарға жуық жерге майлы және мал азығындық дақылдар, картоп, көкөніс-бақша дақылдары егілген. Бұдан басқа, облыс әкімінің тапсырмасымен картоп, көкөніс-бақша шаруасымен шұғылдануға ынталы азаматтарға 295 гектар жер дайындалып берілген еді. Өткен жылдан бері ауылдарда өздерін қажетті азық-түлікпен қамтуға және қосымша табыс табуға ниет білдірген отбасыларға осындай қолдау шарасы қарастырылған.
Бұдан кейін аймақ басшысы Жаңақорған кентіндегі 300 орындық мектеп үйінің құрылысын өз көзімен көрді. Ол 2020 жылдан бері салынып жатыр, алдағы оқу жылында пайдалануға берілмекші. Ондағы жұмыстардың жайымен танысқан әкім ғимарат құрылысын сапалы етіп жүргізіп, белгіленген мерзімде аяқтауды тапсырды.
Сапар соңында Нұрлыбек Машбекұлы аудан орталығындағы С.Қожанов көшесінің бойына орналасқан теміржол өткеліне барды. Ұзындығы 92 метрлік көпір өткен ғасырдың 60-шы жылдары салынған. Енді нысанның техникалық жағдайына сараптама жасалмақшы. Егер әлі де пайдалануға жарамды болса, оған қайта жаңғырту жұмыстары жүргізіледі.
